DILI, STLTIMORLESTE.com – Prokurador Jeral Republika (PJR), Nelson de Carvalho hatene, prosesu kona-ba autor Judisiariu ida neebe deskonfia komete iha asediu Seksual, oras nee daudaun iha ona Inspetora ida mak haree kona-ba kazu nee.
“Konselhu hasai tiha ona iha ona Prokurador ida ka Inspetora ida maka toma konta hela ba prosesu ida nee, “dehan PJR, Nelson ba jornalista sira, iha Edefisiu PJR, Mandarin, Dili, Segunda (22/09/2025).
Nia hatutan, antes nee mos ferias Judisiariu hela tanba nee Prokurador sira foin hahu halao servisu iha loron 16 nee, tanba nee se haree autor Judisiariu nee la mosu ba iha Tribunal rezultadu maka ida nee, maibe nia parte la fo komentariu klean ba ida nee.
Iha fatin ketak, Akademiku UNTL Sebastiao Dos Santos dehan, ema hotu iha lei nia okos, tanba nee tenke lao tuir dalan legal neebe iha.
“Hau hanoin ema hotu iha lei nia okos, tanba nee hotu hotu tenke hakruk ba lei neebe iha no lao tuir dalan legal neebe iha,” dehan nia.
Antes nee, informasaun neebe asesu, kazu asediu seksual nee hasoru joven feto ida.
Husi konversa sira neebe halo entre autor Judisiariu ho joven feto nee, halo ikus mai joven refere sente trauma.
Nunee, depois fulan balu ida nee akontese iha fulan Maiu 2025, feto refere buka apoiu husi JU,S. No hakat dahuluk iha prosesu refere, bazeia ba analiza no konsellu hosi JU,S, mak atu halo keixa dixiplinar ba Conselho Superior Ministerio Publiku, haree katak responsabilidade boot liu hosi mane nee ninia hahalok mak nudar autor judisiariu neebe uza ninia kbiit no sasan Estadu atu komete asediu seksual hasoru feto joven ida.
Jornalista: Terezinha De Deus
Editora: Carme Ximenes
