BAUKAU, STLTIMORLESTE.com – Autoridade Suku Afasa, Postu Administrativu Kelikai Antigu, husu Governu Sentral aumenta orsamentu ba projetu sira husi Programa Nasionál Dezenvolvimentu Suku (PNDS) neebe implementa iha nivel suku.
Xefe Suku Afasa, Joaquim Fernandes Ximenes esplika, projetu sira husi PNDS neebe kada tinan implementa iha nivel suku mak oportunidade diak ba komunidade sira, tanba involve iha servisu hodi hetan rendimentu ekonomia familia. No seluk tan mak projetu husi PNDS mak dezenvolvimentu ba iha baze maioria foku liu ba atividade regular, iha neebe liu husi konselhu Suku deside implementa programa no projetu sira neebe kondis ho nesesidade baziku povu nian, maibe tinan nee alokasaun orsamentu menus nunee difikulta autoridade lokal foti desizaun.
“Kuaze suku hotu orsamentu PNDS tun, ida nee ami preokupa, maibe obrigadu implementa kuandu la sufisiente tenki para,” hateten Joaquim ba jornalista sira iha salaun apuramentu Vila Nova Baukau, Kinta (26/03/2026).
Joaquim Ximenes konsidera alokasaun orsamentu PNDS tinan nee ba suku hotu hotu inklui Suku Afasa menus bainhira kompara ho tinan hirak liu ba, tanba tinan nee hetan deit alokasaun orsamentu hamutuk rihun US$ 30 resin, neebe deside ona atu implementa ba projetu reabilitasaun estrada ligasaun husi Suku ba Aldeia Vekobuti ho distansia metru 300.
Nia informa, projetu reabilitasaun estrada refere iha Suku Afasa seidauk implementa, tanba sei hein prosesu finalizasaun Administrasaun maibe ho alokasaun orsamentu neebé kiik seidauk rezolve prekupasaun komunidade liu liu kondisaun estrada iha Suku refere, tanba konsideradu sei kategoria grave.
“Ami rekomenda dereita ona ba Primeiru Ministru husu atu aumenta osan PNDS tanba nia benefisiu nee direita ba povu,” Joaquim Ximenes akresenta.
Entretantu, Suku Afasa iha Aldeia tolu kompostu Boralai, Uligata no Vekubuti ho total populasaun hamutuk nain 2.163 neebe mane iha nain 1.085 no feto nain 1.078 husi uma kain 574.
(tom)
