BAUKAU, STLTIMORLESTE.com – Autoridade Postu Administrativu Baguia, Munisipiu Baukau, husu Sekretariadu Tekniku Administrasaun Eleitoral (STAE) atu halo atendimentu kartaun eleitoral too baze.
Tuir Administrador Postu Baguia, Mario Xavier da Silva katak, kartaun eleitoral nuudar dokumentus importante ba kada sidadaun neebe idade 17 ba leten, maibe sidadaun idade 17 husi Postu Baguia balun seidauk iha kartaun eleitoral, tanba kestaun distansia entre Postu Baguia ba edifisu STAE Munisipiu Baukau dook, nunee sidadaun sira seidauk trata karta eleitoral.
“Eleitoral nee rasik ba ita nia joven sira neebe kontinua eskola sira presiza eleitoral, maibe ate a data atendimentu seidauk too iha nivel postu, nee difikulta tebes ita nia oan sira,” hateten Mario ba STL liu husi telefone, Segunda (26/05/2025).
Autoridade Postu nee preokupa ho servisu STAE, tanba iha tinan hirak ba kotuk, STAE regulariza atendimentu kartaun eleitoral ba sidadaun sira too iha nivel Postu hodi fasilita sidadaun sira neebe idade 17 no fasilita eleitores neebe kartaun eleitoral lakon no tohar.
Maibe tinan nee too ona fulan Maiu, servisu atendimentu STAE nian seidauk too iha Postu hodi fasilita eleitores sira kona-ba trata kartaun eleitoral.
“Tenke trata eleitoral too iha nivel Postu, labele koloka deit iha nivel Munisipiu, hanesan Autoridade Postu ami hakarak husu STAE Munisipiu koordena ho STAE Nasional oinsa bele habelar atendimentu too iha nivel Postu,” Mario rekomenda.
Diretor STAE Baukau, Natividade Freitas Guterres hateten, STAE mos iha planu prioridade kada tinan, tanba nee sei kobre Postu Administrativu sira iha Munisipiu Baukau hodi fasilita eleitores idozus, invalides no seluk tan neebe presiza atendimentu eleitoral iha baze.
“Komesa iha Junhu nia laran ami sei ba loron 10 kada Postu ida atu bele atende ho sistema movel para lao ba Postu sira nee halo atendimentu,” nia hakotu.
(tom)
