BAUKAU, STLTIMORLESTE.com – Autoridade Munisipiu Baukau aloka orsamentu hamutuk milhaun US$ 1.2 ba projetu hamutuk 8 iha tinan nee.
“Tinan ida nee Baukau projetu 8, neebe total orsamentu ba projetu 8 nee US$ 1.2 milhoes,” hateten Sekretariu Munisipal Baukau Asuntu Administrasaun no Finansas, Juvinal Daniel Filipe Belo ba jornalista sira iha Vila Nova, Baukau, Sesta (25/04/2025).
Nia dehan, projetu 8 refere kompostu husi konstrusaun edifisiu saude ba Suku Libagua, Postu Administrativu Laga, konstrusaun rezidensia ba pesoal saude iha Ossokeli Vemasi, Postu Saude Laisorulai no Lelalai Matebian, konstrusaun rezidensia ba Pesoal Saude Afasa no Eskola Baziku Filial Uakulu Abafala Kelikai Antigu inklui konstrusaun edifisiu Eskola Aslarigua Postu Laga neebe sei responsabiliza husi kompanhia lokal sira.
Tanba nee, Autoridade Munisipiu Baukau antes nee inisia konkursu publiku fo oportunidade ba kompanhia sira sosa dokumentus no realiza ona private miting entre Autoridade Munisipiu ho kompanhia molok ba implementasaun projetu iha terenu.
“Ita iha kalendariu neebe aprovizionamentu prepara hetan aprovasaun nasional katak, prosesu aprovizionamentu fulan Maiu nee tenke remata, fulan Junhu sira nee tenke implementa prosesaun,” Juvinal Daniel Filipe Belo akresenta.
Kompanhia neebe submete dokumentus ba projetu 8 hamutuk 30 resin no tuir planu sei halo selesaun hafoin remata iha fulan Maiu no Junhu hahu ona impletasaun projetu.
Atu fo hanoin fali ba publiku katak, projetu refere impletasaun liu husi Programa Dezenvolvimentu Integradu Munisipal (PDIM) neebe antes iha 10, maibe halo redusaun ba 8, tanba 2 kanseladu neebe implika ba orsamentu hafoin halo mudansa ba BoQ.
Entretantu projetu 8 refere alokadu ho valor orsamentu hamutuk US$ 1,247,297.60.
(tom)
