BAUKAU, STLTIMORLESTE.com – Autoridade Munisipiu Baukau atribui ona envolope Orsamentu Jeral Estadu (OJE) tinan fiskal 2026 nian ba kargu Diretores Servisu Munisipal sira no Administrador Postu nain 8 iha Munisipiu Baukau.
Prezidente Autoridade Munisipiu Baukau, Veneranda Lemos informa, husi OJE tinan fiskal 2026 neebe Governu Sentral preve ba Servisu Administrasaun Autoridade Munisipiu Baukau hamutuk US$ 13,802,085 aloka ba salariu vensimentu, bens servisus, transferensia publikas, kapital minor no kapital dezenvolvimentu, tanba nee iha loron 15 Janeiru 2026 Autoridade Munisipal atribui envolope fiskal 2026 inklui intrudus regras ba implementasaun orsamentu nian ba kargu Diretores Servisu Munisipais no Administrador Postu ho nia programa sira hotu.
“Tinan ida nee hau bele dehan tinan rigor oituan ba implementasaun orsamentu sira nomos ba programa sira neebe aprovadu hotu ona, tanba nee ita espera karak ho regras neebe mak ohin aprezenta ona, entuan sira tenke kumpri ezekusaun orsamentu ho diak no kualidade,” Veneranda hateten ba jornalista sira hafoin remata atribui envolope fiskal tinan 2026 ba Diretores Servisu Munisipal no Administrador Postu sira iha salaun V.I.P Wewe Vila Nova Baukau, Kinta (15/01/2026).
Nia sublina, alokasaun orsamentu husi Governu Sentral ba Autoridade Munisipiu Baukau iha tinan fiskal 2026 hetan mudansa, tanba husi ezekusaun orsamentu fiskal 2025 atinji 97% kompara ho tinan 2025 neebe ezekusaun too deit 89% , mak iha tinan fiskal 2026 ba orsamentu kreze too US$ 13,802,085, tanba alokasaun boot husi kapital dezenvolvimentu nian.
Nia fundamenta, husi alokasaun orsamentu tinan fiskal 2026 neebe iha nuudar sasukat ida ba Autoridade Munisipiu Baukau nia kapasidade ezekusaun.
“Neebe ohin nee ami komvida sira hotu para hatene kada primeiru trimestre sira tenke aprezenta ona ba ezekusaun orsamentu, maibe hau kontente, tanba sira hotu servisu ho dedikasaun tebes iha duni kapasidade atu lidera,” Veneranda katak.
Iha fatin hanesan, Administrador Postu Kelikai, Paul Jacinto Moreira kompromete sei ezekuta orsamentu tinan 2026 ho diak no agradese ba Governu Sentral, tanba la hetan kortes ba orsamentu neebe Postu Kelikai aprezenta iha proposta Munisipiu.
“Ba Postu Kelikai hetan US$ 75,163.00 iha kategoria bens servisus no salariu, hanesan Autoridade Postu tenke ezekuta tuir regras neebe mak iha,” Paul katak
Entretantu iha seremonia distribuisaun envolope fiskal tinan 2026 iha Autoridade Munisipiu Baukau hetan partisipasaun masimu husi Diretor Servisu Munisipal sira inklui Administrador Postu 8.
(tom)
