BAUKAU, STLTIMORLESTE.com – Autoridade Munisipiu Baukau bandu negosiante sira husi Munisipiu seluk halo negosiu iha merkadu Munisipal Baukau transforma kios sai fali hela fatin permanente.
Sekretariu Munisipal Planeamentu Investimentu No Dezenvolvimentu, Eduardo Filipe Ximenes hateten, dadaun iha Munisipiu Baukau laiha ona negosiante ida faan sasan okupa espasu publiku liu liu faan iha trotoar leten, tanba Autoridade Munisipiu liu husi ekipa konjunta muda hotu ona negosiante sira neebe durante nee halo negosiu iha merkadu Vila Nova, Beskem no Vila Antiga ba merkadu foun Tuanaun ka Merkadu Munisipal Baukau.
Maibe iha tempu badak, Autoridade Munisipiu liu husi ekipa konjunta sei identifika hikas ba negosiante sira husi Munisipiu seluk neebe halao negosiu iha merkadu Munisipal ka merkadu Tuanau, tanba iha merkadu laran negosiante husi Munisipiu seluk transforma kios sai fali rezidensia.
“Iha tempu badak ita sei identifika fila fali ba negosiante neebe mai husi Munisipiu seluk sei haruka fila, tanba nee merkadu Munisipal, laos merkadu rejional, se merkadu rejional ok, Manatuto bele tama se se deit bele tama, maibe merkadu Munisipal ita fo uluk espasu ba vendedores lokal, laos temi tiha merkadu Munisipal simu fali Uatulari Uatukarbau mak tama fali halo tan uma iha laran,” hateten Eduardo liu husi diskursu iha salaun apuramentu Munisipiu Baukau, Kinta (17/07/2025)
Autoridade Munisipiu Baukau nia pozisaun, bandu negosiante sira husi Munisipiu seluk iha merkadu Munisipal ka merkadu Tuanau, tanba merkadu Munisipal atu akumula no fo espasu ba negosiante Baukau oan atu utiliza halo negosiu, merkadu Tuanau laos merkadu rejional nunee simu negosiante sira husi Munisipiu seluk okupa halo negosiu hodi hela permanente iha merkadu laran.
Nia argumentu, pozisaun nee, Autoridade Munisipiu la halo rezionalizmu.
“Ita la halo rezionalizmu, maibe se ita hateten merkadu nee merkadu Munisipal, ok o mai faan, maibe faan hotu fila, labele faan permanente iha laran,” hatete Eduardo.
Negosiante Baukau Oan, Dário Filipe Mariz konsidera, bainhira Autoridade Munisipiu Baukau implementa politika nee sei oho negosiante Baukau oan sira nia negosiu, tanba Baukau oan halo negosiu too iha merkadu Munisipiu Vikeke, Lautem no Manatuto, nunee bainhira implementa politika nee, ezatu Autoridade sira husi Munisipiu refere mos aplika politika hanesan afeta mos ba Baukau oan sira nia negosiu.
“Hau hanoin dezisaun ida nee labele, loloos nee ita nakloke, estranjeiru mak labele, mais ita lokal hakarak mai halo negosiu la buat ida, importante mak kria lei taxa iha Baukau,” Dário sujere.
Negosiante Baukau oan nee husu Autoridade Munisipiu Baukau atu tetu ho diak molok implementa politika nee, tanba politika nee implika ba negosiante Baukau oan sira.
(tom)
