BAUKAU, STLTIMORLESTE.com – Negosiante sira iha merkadu foun Tuanau konsidera Autoridade Munisipiu Baukau bosok negosiante sira iha prosesu muda merkadu tuan Vila Nova, Beskem no Vila Antiga ba merkadu foun Tuanau.
Reprezentante negosiante merkadu Tuanau, Mateus Fernandes haktuir, prosesu muda negosiante sira husi merkadu Vila Nova, Beskem inklui Vila Antiga ba faan fali iha merkadu foun, tanba Autoridade Munisipiu Baukau liu husi enkontru ho negosiante sira fo sai deklarasaun katak, negosiante sira neebe faan iha espasu publiku, inklui iha merkadu Vila Nova, Beskem no Vila Antiga prezisa hamamuk fatin hodi ba faan fali iha merkadu foun Tuanau.
Nunee negosiante sira kuaze koopera hodi sobu idak-idak nia baraka no haloot sasan ba faan fali iha merkadu foun Tuanau no husik fatin tuan fo espasu ba reabilitasaun estrada urbana Baukau Vila neebe katak atu akontese iha tinan 2025.
“Sira dehan atu halo alargamentu ba espasu publiku, husi Rotunda Vila Nova too Nagardjo, maibe too agora laiha planu neebe mak sira atinji, ami triste ho sira nia asaun bosok ami nee,” hateten Mateus ba jornalista sira iha merkadu Tuanau, Segunda (17/03/2025).
Tanba informasaun neebe daudaun espalha iha publiku negosiante sira asesu, kona-ba reabilitasaun estrada urbana Baukau nian iha tinan 2025 seidauk akontese, neebe deklarasaun fo sai husi Servisu Obras Publikas Munisipiu Baukau, aleinde mos Asesor Prinsipal ba Vise Ministru Obras Publikas deklara, parte Ministeriu Obras Publikas seidauk halo estudu hodi reabilita estrada urbana Baukau Vila.
Nia haktuir tan, Autoridade Munisipiu Baukau hateten, bainhira negosiante sira koopera muda ba merkadu foun, Autoridade Munisipal sei muda mos negosiante estranjeiru liu-liu Xina sira neebe halo negosiu iha merkadu Baukau ba halo hikas negosiu iha kapital Dili.
Nia sublina, nunee negosiante lokal sira iha Baukau koopera hodi muda, maibe laiha rezultadu, tanba Xina sira kontinua eziste iha merkadu Baukau hodi faan kompete ho negosiante lokal.
“Ami husu Autoridade atu responsabiliza ba liafuan sira neebe hasai, dehan atu hasai Xineza sira iha merkadu Baukau, maibe realidade laiha mudansa ba liafuan neebe promete ba ami,” Katak Mateus.
Nia argumenta, relasiona politika Autoridade Munisipal atu muda negosiante Xineza sira husi merkadu Baukau ba Dili, maibe too ohin loron seidauk akontese no kontinua halo negosiu, negosiante lokal sira planeia tempu badak sei halo asaun pasifika, tanba muda husi merkadu tuan ba faan iha merkadu foun la hetan rendimentu, kestaun merkadu foun dook husi komunidade, enkuantu Xina faan besik liu iha komunidade sira nia hela fatin hetan rendimentu diak.
Aleinde politika reabilitasaun estrada urbana Baukau Vila neebe seidauk akontese, negosiante sira iha merkadu foun Tuanau sei tuun hodi harii hikas baraka iha merkadu tuan, Vila Nova, Beskem inklui Vila Antiga, tanba konsidera laiha politika klaru muda negosiante.
Enkuantu negosiante Crispin Filipe Soares la satisfas ho politika Autoridade Munisipal, tanba estrada urbana Baukau Vila neebe promete atu reabilita iha tinan 2025 la akontese, maibe estrada kontinua aat no konsidera grave liu ona, neebe Autoridade Munisipal halo deit manutensaun ba estrada aat no kuak sira ho tipu taka kuak.
“Sira dehan atu halo estrada, entaun dezenvolvimentu ami hakarak, maibe agora ita haree, tuun ba nee atu halo estrada la halo estrada, maibe taka fali kuak hanesan suku roupa,” Crispin realsa.
Negosiante nee kestiona, relasiona kondisaun estrada atual liu-liu husi area rotunda Vila Nova ba merkadu foun Tuanau no kontinua ba rotunda Nagardjo aat no grave, iha neebe difikulta movimentu ema ho transporte publiku no privadu sira too iha merkadu foun refere sosa sasan neebe negosiante lokal sira faan.
Nia dehan, durante funsionamentu negosiu negosiante lokal sira iha merkadu foun Tuanau la hetan rendimentu kompara antes halo negosiu iha merkadu tuan Vila Nova, Beskem inklui Vila Antiga neebe hetan rendimentu diak, tanba kalan loron hetan US$ 50.00 ba leten, maibe daudaun nee dala ruma laiha, loron ida la hetan rendimentu.
“Kareta halai mai iha nee araska, tanba kondutor sira dehan hanesan nee, ba merkadu foun selu 0.50 sentavus, entaun ema la mai sosa, fo impaktu ba ami kreditu sira nee,” nia katak.
Negosiante nee husu Autoridade Munisipiu Baukau atu buka meius hodi implementa kompromisu kona-ba reabilitasaun estrada urbana iha tinan nee, maibe reabilitasaun estrada mak la akontese, sei husik merkadu foun Tuanau no harii hikas baraka iha fatin merkadu tuan sira hodi halo negosiu, tanba kestaun rendimentu.
Ligadu asuntu nee, STL tenta konfirma kompromisu reabilitasaun estrada urbana iha Baukau Vila ba Prezidente Autoridade Munisipiu Baukau, Veneranda Lemos, maibe laiha fatin atu fo komentariu, tanba sei iha Dili.
(tom)
