BAUKAU, STLTIMORLESTE.com – Autoridade Munisipiu Baukau sei dezenvolve problema infraestrutura bazika sira, inklui konstrui edifisiu foun hamutuk 10 iha tinan 2025.
Lia hirak nee hatoo husi Sekretariu Munisipal Planeamentu Investimentu No Dezenvolvimentu Integradu, Eduardo Filipe Ximenes ba jornalista sira, hafoin remata pre-kualifikasaun ba kompanha lokal hamutuk 89, iha Vila Nova, Baukau, Segunda (09/12/2024).
“Nee ba various kontrusaun nian, estrada Ponte Cheias no edifisiu, eletrisidade, bee moos no selu-seluk tan,” dehan Eudardo.
Tanba tuir nia, iha tinan 2025 Autoridade Munisipal sei implementa projetu 10 husi husi Programa Dezenvolvimentu Integradu Munisipal, mak hanesan konstrui Eskola no Postu Saude neebe sei finansia ho OJE 2025 iha Munisipal, enkuantu projetu bee moos, eletrisidade no estrada sei finansia husi parseiru dezenvolvimentu UNDP.
No projetu hirak nee hotu sei implementa iha nivel Postu Administrativu hotu, hodi responde preokupasaun komunidade nian konaba infraestrutura bazika.
Maibe atu implementa projetu hirak nee ho diak, Autoridade Munisipiu inisia rejistu ona kompanha lokal hamutuk 115 neebe kontinua ba iha prosesu pre-kualifikasaun hamutuk 89 neebe sei hakat ba faze selesaun, tuir mai hodi konkore projetu neebe Autoridade Munisipal inisia ba Publiku.
Tanba nee ekipa sei halo verifikasaun prosesu Administrasaun no ekipamentus servisu ba kada kompanha, hafoin konsidera kompanha selesionadu hodi jere projetu iha terenu bazeia ba problema neebe komunidade infrenta.
Nunee kompanhia neebe selesionadu Autoridade Munisipal sei atribui projetu tuir kapasidade finanseiru ba kada kompanha, nunee bele jere projetu sira termina tuir responsabilidade hodi fo benefisiu ba komunidade.
Iha fatin hanesan, Diretora Kompanhia lokal MR Construction Unip.Lda, Juviana da Silva hatete, kompanhia MR Construction Unip.Lda nuudar parseiru dezenvolvimentu ba Governu, nunee bainhira hetan fiar hodi responsabiliza ba kualker projetu neebe Autoridade Munisipal atribui, prontu atu ezekuta tuir regras no prosedimentu.
(EST 2)
