BAUKAU, STLTIMORLESTE.com – Servisu Munisipal Administrasaun Autoridade Baukau gastus kombustivel litru rihun 61 resin durante tinan ida.
Diretor Kompanhia Manudare Fuel, Hélio Francisco da Costa esplika, iha tinan 2024 Autoridade Munisipiu Baukau kontaktu Manudare Fuel ho valor orsamentu rihun US$ 83 resin, neebe hahu husi fulan Marsu 2024 too Marsu 2025, oferese kombustivel produtu gazoel no gazolina hamutuk litru rihun 61 resin.
“Orsamentu US$ 83 mil tinan ida nee, atu hetan litru hira depende ba ita nia koutasaun neebe ita lori ba konkore iha munisipiu mak determina nia litrus nee, neebe nia litrus nee 61 mil ital kombustivel ba Autoridade Munisipiu Baukau,” hateten Hélio Francisco da Costa ba STL iha Vila Antiga, Baukau, Kinta (17/04/2025).
Nia sublina, koutasaun ba kombustivel neebe kompanhia Manudare Fuel konkore ba kombustivel litru ida ho folin US$ 1.34, nunee ho orsamentu rihun US$ 83 resin responde ba kombustivel produtu gazoel no gazolina hamutuk litru rihun 61 resin.
Nia fundamenta, bazeia ba formatu kombustivel neebe Servisu Administrasaun Autoridade Munisipiu Baukau aplika ba Kompanhia Manudare Fuel prepara formatu administrasaun ou nota kombustivel ba kada diresaun.
“Kada diresaun neebe mak tuir template husi Autoridade Munisipiu Baukau liu husi finansas fo ba ami hodi ami halo tuir sira nia padraun administrasaun mak iha 12 Diresaun Servisu Munisipal,” Hélio Francisco da Costa akresenta.
Durante tinan ida oferese kombustivel ba Servisu Administrasaun Autoridade Munisipiu Baukau ho Diresaun Servisu hamutuk 12 neebe utiliza motorizada no kareta sapa matrikula Governu hodi halao funsionamentu iha Munisipiu Baukau.
Too notisia nee publika , STL seidauk halo konfirmasaun ho Sekretariu Munisipal Asuntu Finansas, tanba loron toleransia.
(tom)
