BAUKAU, STLTIMORLESTE.com – Negosiante sira iha merkadu Vila Nova sujere ba Autoridade Munisipiu Baukau atu haree lista Orsamentu Jeral Estadu (OJE) 2025 molok muda sira ba merkadu foun Tuanau, iha Postu Administrativu Baukau Vila.
Kestaun nee hatoo husi negosiante produtu lokal, Cristalina Lay de Almeida ba STL iha merkadu Vila Nova, Baukau, Tersa (19/11/2024).
“Hakarak muda nee merkadu prontu tiha mak muda ami dala ida, agora merkadu seidauk prontu mak sira muda deit ami, tanba iha 2025 merkadu moderniza, nee oinsa sira nia hanoin,” dehan nia.
Negosiante nee espresa, sente triste ho dezisaun Autoridade Munisipiu, tanba liu husi diskursu Primeiru Ministru (PM) nian iha debate Orsamentu Jeral Estadu 2025 hateten katak, liu husi Fundo Infraestrutura ho alokasaun milhaun US$ 4,6 atu konstrui merkadu foun iha Munisipiu Ainaro, Maliana, Loes no Manatuto, nunee mos merkadu Baukau no Ermera halo moderniza sai merkadu Munisipal, maibe daudaun muda ona husi merkadu tuan Vila Nova ba merkadu foun Tuanau.
Nunee Nia husu Autoridade Munisipiu atu haree OJE 2025 no moderniza tiha merkadu refere hafoin muda negosiante, tanba daudaun muda ona too 2025 mak merkadu refere halo modernizasaun, sei fo impaktu ba faan nain sira nia produtu, tanba mosu rai rahun barak.
Aleinde nee mos nia dehan, kondisaun merkadu foun neebe daudaun atu koloka negosiante sira ba hela hodi faan, kondisaun seidauk sufisiente ba negosiante faan produtu lokal, tanba la kria kondisaun masimu.
Iha sorin seluk, negosiante Cosme Morreira Cabral Soares hateten, hanesan sidadaun Timoroan prontu kolabora ho Autoridade relevante sira hodi muda ba merkadu foun, maibe prezisa aumenta kondisaun iha merkadu refere, tanba fatin seidauk sufisiente ba negosiante sira atu utiliza.
“Hau rasik hetan ona fatin iha merkadu foun, maibe iha neeba tenke prepara bee moos no hariis fatin, mezmu iha ona, maibe seidauk sufisiente ba ami,” nia sujere.
Ligadu asuntu nee, jornalista STL tenta konfirma Sekretariu Munisipal Planeamentu Investimentu No Dezenvolvimentu Integradu , Eduardo Filipe Ximenes nuudar mos lidera ekipa konjunta muda negosiante sira iha terenu, maibe la fo komentariu.
Entretantu tuir dadus negosiante neebe STL asesu atu muda ba merkadu foun Tuanau hamutuk 879, ho tipu negosiu obralan 148, roupa loja 125, faan sapatu 87, sembako 146, sasan dapur 54, kolisaun 10, alfateh 14, faan sana rai 3, Tais Timor 7, faan telefone 15, baber shop 5, sasan eletroniku 9, kosmetik 13, faan osan mean 1, faan pulsa EDTL 2, faan aimoruk ba Agrikultura nian 1, Farmasia 1, Faan naan karun no seluk tan 10, faan ikan 23, Produtu lokal 200,no mini restorante 7.
Husi negosiante numeru refere neebe halo nia baraka rasik prontu ona atu utiliza ba negosiu 500, baraka neebe halo maibe sei metade 157, no 222 seidauk halo nia baraka.
(EST 2)
