BAUKAU, STLTIMORLESTE.com – Autoridade Munisipiu Baukau Inaugura ona infraestrutura bazika hamutuk 3, kompostu konstrusaun sede suku, moru protesaun ba sentru saude inklui mini merkadu iha Suku Loilubu, Postu Administrativu Vemasi, Munisipiu Baukau.
“Serimonia ohin iha Suku Loilubu ita inaugura Sede Suku, mini merkadu nomos moru neebe haleu sentru saude neebe nia orsamentu sira mai husi PNDS,” hatete Prezidente Autoridade Munisipiu Baukau, Veneranda Lemos ba jornalista sira, hafoin remata serimonia inaugurasaun iha Loilubu, Tersa (07/01/2025).
Projetu 3 nee tuir nia, finansia husi Ministeriu Administrasaun Estatal neebe aloka orsamentu ba konta bankaria Suku hodi implementa servisu tuir prioridade Suku nian, maibe ba projetu konstrusaun Sede Suku ho orsamentu neebe limitadu, tanba alokasaun orsamentu ho total rihun US$ 12 neebe la bele kobre uma medida 9X7 neebe kompleta ho asesoria hanesan plafond, taka ajulezu no seluk tan.
Nunee obrigatoriu parte kompanhia lokal no veteranu Loilubu oan tenke fo kontribuisaun hodi kompleta asesoria hirak nee.
Husi kontribuisaun neebe parte kompanhia lokal no veteranus Loilubu oan fo, Veneranda orgulhu, tanba iha konsiensia hodi servisu ho autoridade lokal hodi kontribui dezenvolvimentu iha nivel Suku.
No husi projetu 3 neebe finaliza ona hodi Governu liu husi Autoridade Munisipiu entrega ona ba komunidade Suku Loilubu atu utiliza, bele responde ona komunidade nian preokupasaun ba infraestrutura bazika mezmu ho fazeadamente.
Ho nunee Veneranda husu komunidade no Autoridade Suku Loilubu atu kuidadu fasilidade 3 refere hodi utiliza ba tempu naruk, nunee Governu foku ba problema seluk neebe too ohin loron seidauk fo atensaun.
Enkuantu Xefe Suku Loilubu, Joanico da Costa Freitas esplika, projetu 3 nee hanesan konstrusaun mini merkadu ho valor orsamentu rihun US$ 37 resin, moru protesaun rihun US$ 39 resin ba medida 18X100 haleu sentru saude, no konstrusaun sede suku rihun US$ 12, neebe projetu 3 nee implementa servisu husi komunidade hanaran projetu komunitariu.
Maibe ba projetu 3 refere kuaze hetan mos apoiu husi parte kompanhia lokal balun no veteranus Loilubu oan sira, tanba hakarak fo kontribui dezenvolvimentu ba Suku.
Apoiu neebe parte sira fo mak hanesan, ajulezu, tripleks, raihenek, batako, sumenti, fatuk inklui besi, maibe apoiu hotu tuir idak-idak nia kapasidade.
Entretantu komunidade Satornino da Silva Correia konsidera, infraestrutura 3 neebe Autoridade Munisipal inaugura fo vantajen boot ba komunidade Loilubu, tanba antes nee moru protesaun ba fasilidade saude laiha, fatin sede suku kondisaun aat no laiha mini merkadu hodi fasilita negosiante lokal sira, maibe daudaun hahu hetan mudansa iha prosesu ukun aan liu husi hetan konstrusaun moru protesaun, sede suku foun inklui mini merkadu.
(EST 2)
