BAUKAU, STLTIMORLESTE.com – Autoridade Munisipiu Baukau inaugura sala 2 ba estudante iha Eskola Ensinu Baziku Filial Makalaku, Postu Administrativu Kelikai, Munisipiu Baukau.
“Ohin ita inaugura mos sala 2, ida nee harii iha 2022 nia orsamentu kiik oan mak rihun US$ 26 ho mobiliariu hotu iha laran mais kualidade,” hateten Prezidenti Autoridade Munisipi Baukau, Veneranda Lemos ba jornalista sira hafoin remata inagurasaun, Kinta (05/12/2024).
Nia hateten, orsamentu ba konstrui sala 2 refere husi Programa Nasional Dezenvolvimentu Suku, liu husi programa RKRE neebe konstrui ho tipu projeitu komunitariu neebe servisu husi komunidade sira.
Tuir PAM Baukau nee katak, orsamentu rihun US$ 26 refere ezekuta duni ho kualidade, tanba bele kompleta kedas ho fasilidade sira hanesan meza no kadeira ba estudante hamutuk 74, inklui fasilidade ba profesor hanesan armariu livru 2, neebe kada sala ida meza no kadeira ba estudante hamutuk 35, inklui armariu 1 no meza kadeira ba profesor.
“Buat hotu prontu ona entrega ba eskola sira mak tenke kuidadu, tanba tinan tinan ita laos halo eskola,” Veneranda rekomenda.
Autoridade nee rekonhese, iha sala 3 neebe kondisaun grave, nunee promete sei halo konstrusaun iha Dezembru tinan nee.
Iha fatin hanesan, Reprezentante Koordenador eskola, Rotario Sarmento Ximenes agradese ba Governu neebe liu husi PNDS konstrui ona sala foun ba eskola refere, maibe seidauk sufisiente, tanba numeru estudante barak, maibe sala balun kondisaun sei aat inklui mos dapur ba estudante sira.
(EST 2)
