BAUKAU, STLTIMORLESTE.com – Autoridade Munisipiu Baukau liu husi ekipa konjunta hahu kasa animal hakiak sira neebe komunidade kesi iha estrada ninin no besik edifisu publiku sira.
Xefe ekipa konjunta atual Sekretariu Munisipal Planeamentu Investimentu No Dezenvolvimentu Integradu , Eduardo Filipe Ximenes informa, iha loron 26 fulan Maiu tinan nee, Autoridade Munisipiu Baukau liu husi ekipa konjunta halo inspesaun iha sidade Baukau kobre husi Vila Antiga too Vila Nova buka animal hakiak sira neebe komunidade kesi besik liu iha estrada publiku, tanba fo impaktu ba movimentu ema ho transporte publiku no privadu sira.
“Ekipa halo inspesaun iha sidade laran foka liu ba komunidade sira neebe kesi animal bibi, kuda, karau iha estrada publiku sira, ida nee perturba movimentu publiku, iha semana kotuk liu ba ita nia komunidade ida monu tanba deit kesi bibi iha estrada ninin, bainhira motor ultrapasa bibi korta komunidade monu too kanek, hanesan nee ita la permite akontese iha sidade,” hateten Xefe ekipa konjunta Eduardo Filipe Ximenes ba jornalista sira iha Vila Nova Baukau, Tersa (27/05/2025).
Nia sublina, Autoridade Munisipiu Baukau liu husi ekipa konjunta halo inspesaun no foku animal sira neebe komunidade sira kesi besik estrada publiku, bazeia ba dekretu lei 33 kona-ba ijiene ordem publika, tanba nee autoridade bandu no la permite atu sidadaun sira kesi kualker animal iha estrada publiku no edifisiu publiku sira.
Nia fundamenta, ekipa daudaun kontinua ezekuta servisu iha terenu, bainhira detekta kualker animal neebe komunidade kesi besik estrada publiku, ekipa sei foti asegura iha resintu Administrasaun Autoridade Munisipiu Baukau.
“Horiseik ekipa lao iha Vila Antiga no Vila Nova kaptura bibi malae neen no bibi rusa rua, tanba kesi besik estrada publiku no balun kesi besik edifisu publiku sira,” Eduardo fundamenta.
Xefe ekipa konjunta nee akresenta, inisiu ekipa konjunta halo inspesaun iha sidade Baukau kobre Vila Antiga no Vila Nova konsege kaptura animal hakiak husi komunidade sira hamutuk ualu (8) kompostu bibi malae neen (6) no bibi rusa rua (2), tanba kesi besik estrada publiku no balun kesi besik edifisu publiku neebe konsidera kria saude publiku neebe la saudavel.
Nia deklara, husi animal hakiak sira neebe ekipa kaptura no asegura iha resintu Administrasaun Autoridade Munisipiu Baukau, aplika koima ba nain neebe laiha responsabilidade no hasai mos fotografia animal neebe ekipa kaptura ona, nunee bainhira kaptura animal ida ba dala rua sei la entrega hikas fali ba nain.
“Koima minimu US$ 5.00 masimu US$ 500.00, primeiru ita fo US$ 5.00 maibe nunee beibeik ita fo multa lao tuir medida maksimal, osan sei tama ba kofre estadu, tanba iha formatu,” Eduardo informa.
Xefe ekipa nee katak, husi animal hakiak ualu (8) neebe ekipa kaptura, kada animal ida ekipa aplika koima US$ 5.00 tuir formatu neebe prepara ona sei tama ba kofre estudu.
Nia informa, animal sira neebe ekipa kaptura iha loron dahuluk sei asegura durante loron rua, liu loron rua mak nain la marka prezensa hodi selu koima, ekipa konsidera animal fuik, tanba nee sei entrega ba komunidade orfonatu sira inklui komunidade iha hospital hodi fo han ba hirak neebe presiza.
Tanba nee Autoridade Munisipiu Baukau liu husi ekipa konjunta kontinua apela ba komunidade sira iha sidade Baukau atu hakiak animal tenke kria fatin propriu, tanba sidade laos fatin hakiak animal liu-liu kesi besik iha estrada publiku no edifisiu publiku sira.
(tom)
