BAUKAU, STLTIMORLESTE.com – Autoridade Munisipiu Baukau kontinua orienta kompanhia implementador, atu aselera projetu manutensaun ba estrada urbana Baukau Vila neebe tipu cor ho sementi.
Autoridade Munisipiu Baukau liu husi Sekretariu Munisipal Planeamentu Investimentu No Dezenvolvimentu, Eduardo Filipe Ximenes esplika, tuir kontratu entre Ministeriu Obras Publikas no kompanhia implementador projetu halo manutensaun ba estrada urbana iha Baukau Vila, hahu iha loron 01 Junhu 2023 no tuir planu remata iha 01 Junhu 2025, maibe daudaun progresu seidauk atinji, tanba kompanhia servisu tarde.
“Ita nafatin hateten ba empreza nee kontinua servisu, agora daudaun mos sira servisu hela, para nia taka hotu buat neebe nia kee ona, nia tenke responsabilidade,” hateten Eduardo ba jornalista sira iha resintu Servisu Administrasaun Munisipiu Baukau, Kinta (03/0/2025)
Nia sublina, tuir kontratu neebe selebra parte kompanhia implementa servisu iha terenu hanesan halo manutensaun ba estrada kondisaun kuak no aat sira, iha parte estrada tetuk sei ateru ho rai mutin no parte suvida cor ho sementi no hetan kritiku husi sosiedade, maibe Autoridade Munisipiu kontinua orienta kompanhia hodi aselera servisu, tanba hakarak fasilita movimentu ema ho transporte.
Nia argumenta, kompanhia implementador projetu manutensaun estrada urbana Baukau Vila hetan kontratu husi Governu anterior, maibe implementasaun projetu tarde, tanba kauza husi kompanhia lao ba mai deit lakohi implementa projetu ho lalais atua kondisaun aat sira.
Nunee inisiu tinan nee, Autoridade Munisipiu Baukau bolu kompanhia implementador projetu hodi atua kondisaun estrada aat sira iha Baukau Vila atu fasilita movimentu transporte publiku no privadu, liu-liu labele fo impkatu ba inan isin gravida sira nia movimentu ho transporte, tanba orsamentu aprovadu, maibe kompanhia la halo servisu.
“Tanba nee ita bolu kompanhia nee mai ho sementi ho rai mutin taka tiha kuak sira nee para hodi movimentasaun transporte publiku no ambulansia sira lori moras mai nee diak, agurda ita hein prosesu verifikasaun ba estrada urbana agora daudaun lao hela iha ADN,” Eduardo akresenta
Nia katak, projetu reabilitasaun estrada urbana daudaun sei faze verifikasaun iha Ajensia Dezenvolvimentu Nasional, maibe daudaun implementa nee projetu manutensaun, nunee husu publiku labele duvida, tanba prosesu reabilitasaun estrada urbana Baukau Vila sei akontese bainhira prosesu verifikasaun remata ona.
Maibe husu mos ba kompanhia implementador atu aselera servisu cor no ateru lalais, nunee bele fasilita movimentu ema ho transporte lao ho diak.
Hatan ba kestaun nee, Diretor Kompanhia Roman Grigio, Unip.Lda, Estevao Paulo Sarmentu hateten, projetu manutensaun estrada urbana Baukau Vila lao tarde, tanba hafoin manan tenderizasaun husi Ministeriu Obras Publikas iha tinan 2023, laiha fatin neebe indika atu implementa projetu, maibe liu husi esforsu Servisu Obras Publikas Munisipiu Baukau hafoin implementa projetu manutensaun ba estrada urbana Baukau Vila.
“Ezekuta tarde nee lokasi ida ami manan nee mak laiha, ami kompanhia idak-idak buka lokasi mak foin servisu, tanba nee tarde oituan, maibe lo-loos nee servisu tiha ona, maibe lokasi nee, entaun dia 27 Janeiru nee mak ami komesa servisu,” hateten Paulo.
Kompanhia Roman Grigio garante sei finaliza projetu manutensaun tuir data kontratu neebe selebra ona, bainhira iklima la difikulta servisu, maibe bainhira hetan impaktu husi iklima, sei bele termina too fulan Julhu tinan nee, tanba parte ministeriu aseita ba estensaun ba projetu nee.
Paulo deklara, tuir kontratu neebe selebra kondisaun estrada aat iha fatin tetuk no suvida sira, hotu-hotu cor ho sementi, maibe iha inisiu ateru uluk ho rai mutin hafoin cor ho sementi, tanba kontratu mak deside.
Nia katak, bainhira projetu manutensaun estrada urbana Baukau Vila seidauk remata mak implementasaun projetu reabilitasaun akontese, nuudar Baukau oan koopera ho desizaun sira, tanba hakarak kontribui ba dezenvolvimentu, maibe Governu tenke hatudu fali fatin seluk hodi kompanhia bele servisu bainhira data kontratu ba projetu manutensaun seidauk remata.
Entretantu projetu manutensaun estrada urbana Baukau Vila ho numeru kontratu MPW-W-230040, numeru tenderizasaun KP/EO/MOP/23018 ho valor orsamentu rihun US$ 600.00 neebe kompanhia hahu servisu iha loron 27 Janeiru 2025 too ohin loron atinji ona 15%.
(tom)
