BAUKAU, STLTIMORLESTE.com – Autoridade Munisipiu Baukau planeia atu kontinua lori besik dezenvolvimentu ba povu Baukau, iha tinan 2026 liu husi Programa Nasional Dezenvolvimentu Suku (PNDS).
Deklarasaun nee hatoo husi Prezidente Autoridade Munisipiu Baukau, Veneranda Lemos liu husi diskursu iha reuniaun Konselhu Kordenasaun Munisipal, neebe realiza iha salaun apuramentu Vila Nova, Baukau, Segunda (05/01/2026).
“Dezenvolvimentu lori besik ba povu mak liu husi programa PNDS, la aproveita ho didiak pasiensia, ba Suku neebe ativu bele fo rua ou tolu depende ba nia kapasidade, hau aprezia tebes ba Suku Laisorulai de Baixo neebe loke estrada ba Aldeia 4 tutela iha Suku. Ba Suku neebe mak hau haree katak la duun iha movimentasaun ou ladun badinas deskulpa, mais nee ita trava malu, mais sira neebe mak tuir regras tau prioridade ba asuntu neebe mak Munisipiu preokupa ita sei koalia ba malu,” dehan nia.
Nia dehan, planu Autoridade Munisipiu Baukau nian neebe atu kontinua lori besik dezenvolvimentu ba povu iha tinan 2026 mak liu husi projetu sira neebe implementa liu husi Programa Nasional Dezenvolvimentu Suku (PNDS), tanba nee sei aloka orsamentu ba Suku sira neebe iha kapasidade jere projetu PNDS iha tinan 2025 ho diak, mak sei hetan orsamentu ba projetu 2 too 3, maibe depende ba kapasidade ezekusaun no jere projetu.
Tanba nee hanesan Prezidente Autoridade Munisipal Baukau, Veneranda apresia ho kapasidade Autoridade Suku Laisorulai de Baixo neebe iha tinan 2025 konsege hatudu progresu servisu fiziku diak, tanba ho orsamentu PNDS loke estrada foun ba Aldeia 4 iha Suku refere neebe bele ajuda ona komunidade sira iha area remotas.
“Hau hanoin Xefe Suku sira ho deit PNDS la susar, hau husu Xefe Suku sira konsentra ho didiak atu haree saida mak prioridade,” Veneranda sujere.
Eis deputada nee husu Autoridade Suku sira neebe husi Suku vizinhu atu koordena no foku loke estrada foun halo ateru nunee povu bele sente dezenvolvimentu mezmu neineik, maibe beibeik, tanba PNDS iha atu fo benefisiu ba povu, maibe ba Suku neebe implementa projetu PNDS tinan 2025 too ohin loron seidauk finaliza, Autoridade Munisipiu Baukau sei koordena responsavel PNDS Munisipiu Baukau hodi haree asuntu refere.
Entretantu tinan 2026 Autoridade Munisipiu Baukau sei aloka orsamentu 2 milhões atu implementa projetu prioridade iha nivel Suku, maibe Autoridade Munisipiu Baukau seidauk hetan planu prioridade 2026 nian husi Suku, tanba seidauk enkontru ho PNDS Munisipiu Baukau.
Jornalista: Tomas Reis
Editora: Carme Ximenes
