BAUKAU, STLTIMORLESTE.com – Autoridade Munisipiu Baukau liu husi ekipa konjunta, prepara ona ekipamentu pezadus hanesan eskavator 2 atu sobu uma okupa espasu publiku sira.
“Nee ita uza eksa para ba sobu obrigatoriamente sasan iha laran ita hasai inklui uma sira neebe okupa espasu publiku tenke sobu, apartir orsida too loron 22 Janeiru 2025,” hatete Xefe Ekipa Konjunta, atual Sekretariu Munisipal Planeamentu Investimentu no Dezenvolvimentu, Eduardo Filipe Ximenes ba jornalista sira iha Vila Nova, Baukau, Tersa (14/01/2025).
Nia esplika, uma okupa espasu publiku neebe sai tarjetu ba ekipa konjunta atu sobu mak tau ona marka X mean neebe antes nee ekipa sira tau ona.
Enkuantu kona-ba total uma okupa espasu publiku, parte dirijente nee seidauk bele fo sai ba publiku, maibe sei sobu husi Vila Antiga too Vila Nova.
Orariu ba ekipa konjunta atu sobu mak iha loron 14 Janeiru 2025 tuku 02:00 meudia, neebe sei hahu husi rotunda Vila Nova-Terminal, kontinua iha area Benfica-BNCTL, uma mean too area Tribunal, Bairu Unidade-Uma Lima Tirilolo no remata iha Vila Antiga.
“Ita ohin deside ona tenke sai, fatin nee ita liu husi Komando Polisia Munisipiu sei tau polis line, se tau ona polis line se mak ultrapasa nia tenke toma responsabilidade,” Eduardo akresenta.
Autoridade Munisipal mos prepara ona transporte truk 10 neebe atu tula sai sasan husi uma neebe hetan sobu.
Tanba Xefe Ekipa nee argumenta, programa refere atu hahu antes nee fo ona avizu ba komunidade sira, nunee tempu ona atu koopera.
Nunee mos nia dehan, bainhira sobu uma okupa espasu publiku sira remata sei kontinua kobre bairu sira halo observasaun ba fahi luan sira, nunee bainhira identifika komunidade neebe hakiak fahi besik uma ekipa sei halo aprensaun.
(EST 2)
