BAUKAU, STLTIMORLESTE.com – Autoridade Munisipiu Baukau liu husi reuniaun Konselhu Koordenasaun Munisipal prepara projetu 20 resin ba Orsamentu Jeral Estadu (OJE) 2026.
“2026 Baukau kuaze iha projetu 20 resin, depois de koordenasaun ida nee ita sei halo preparasaun diak para lori ba Komisaun Revizaun Orsamental, espera katak labele hetan kortes boot hanesan 2025,” hateten Prezidente Autoridade Munisipiu Baukau, Veneranda Lemos ba jornalista sira hafoin partisipa sorumutu estraordinariu Konselhu Koordenasaun Munisipal iha salaun apuramentu Vila Nova, Baukau, Kurta (07/05/2025).
Nia esplika, projetu 20 resin simu husi Asembleia Postu Administrativu sira neebe prepara ba infraestrutura Edukasaun, Saude, Agrikultura no seluk tan iha Munisipiu Baukau, neebe importante no relevante ba nesesidade komunidade nian.
Nia sublina, Autoridade Munisipiu Baukau liu husi Konselhu Kordenasaun Munisipal halo preparasaun no sei kontinua ba Konselhu Konsultivu Munisipal hafoin aprezenta ba Nasional hodi deside ba destinu projetu 20 resin husi Komisaun Revizaun Orsamental.
“Hau labele hatene bele ga labele, nee depende ba Komisaun Revizaun Orsamental, maibe ita halo aprezentasaun mak hatene, sim Baukau bele hetan hotu projetu 20 resin nee, graças a deus,” katak Venerada.
Enkuantu Administrador Postu Administrativu Kelikai Antigu, Francisco Matias Gusmão “Júnior” hateten, liu husi reuniaun Asembleia Postu Administrativu (ASPA) iha Postu Kelikai Antigu deside proposta lima, neebe diriji ona ba Konselhu Kordenasaun Munisipal no esperansa bele hetan konsiderasaun iha Komisaun Revizaun Orsamental.
“Proposta nee importante, liu-liu estrada, tanba fo asesu ba komunidade sira hodi halo movimentu,” katak Junior.
Nia esplika, proposta lima neebe liu husi ASPA, proposta tolu ajusta iha Programa Dezenvolvimentu Integradu Munisipal mak hanesan estrada husi Suku Gurusa ba Postu pur-volta kilometru 6.5, husi Suku Namanei ba Postu hamutuk kilometru 7 resin no kanalizasaun bee moos husi Uasunana ba edifisiu publiku no komunidade sira.
Enkuantu, proposta rua ba fundu infraestrutura mak hanesan estrada husi Postu Administrativu Laga area Daelari ba Postu no inklui konstrusaun ponte iha Suku Gurusa ba postu neebe presiza tebes atu hadia hodi fasilita movimentu transporte publiku.
(tom)
