BAUKAU, STLTIMORLESTE.com – Autoridade Munisipiu Baukau sei festeza Timor Leste (TL) nia adezaun ba Association of Southeast Asian Nations (ASEAN), iha loron 26 Outubru 2025.
Sekretariu Munisipal Planeamentu Investimentu no Dezenvolvimentu, Eduardo Filipe Ximenes hateten, relasiona Timor-Leste nia adezaun ofisialmente liu husi asina paktu iha Kuala Lumpur loron 26 Outubro tinan nee.
Timor Leste nia adezaun ba ASEAN nuudar impaktu diak ba Timor Leste, tanba Timor Leste nuudar membru Comunidade Pais de Lingua Portugues (CPLP) dahuluk adere ba ASEAN mak Nasaun sira sei liu husi Timor Leste tama iha ASEAN, nunee Nasaun sira husi CPLP atu ba Indonezia sei liu husi Timor Leste hodi fo reseitas.
Timor Leste nia adezaun ba ASEAN nuudar momumentu importante, tanba nee Governu aloka orsamentu hamutuk rihun US$ 8 ba Autoridade Munisipiu Baukau atu festeza no selebra loron refere.
“Ohin ita enkontru koordenasaun ho entidade kamadas sosiais sira hotu inklui mos Instituisaun Estadu sira ita koalia ba malu sobre komemorasaun festa ba iha adezaun Timor-Leste ba ASEAN,” hateten Eduardo ba jornalista sira, hafoin remata enkontru ho entidades sira, iha salaun Wewe Vila Nova, Baukau, Sesta (17/10/2025).
Nia sublina, enkontru refere atu junta opinoes husi entidades hotu, tanba festeza Timor Leste nia adezaun ba ASEAN sei realiza atividades hanesan animasaun popular iha Baukau.
Timor Leste nia adezaun ba ASEAN nuudar momumentu importante, tanba nee Governu sentral liu husi Autoridade Munisipiu Baukau sei komvida komunidade sira husi Postu Administrativu hotu no Autoridade Lokal sira atu partisipa iha seremonia refere.
“Iha Baukau ita sei realiza iha resintu Autoridade Munisipiu festeza Timor Leste nia adezaun permanente ba ASEAN nian, husu sidadaun hotu-hotu iha Baukau Dili, festa ida nee festa Timor nian husu partisipa bele fo susesu ba ita nia adezaun ida nee,” Eduardo katak.
Iha sorin seluk Visi Prezidente Kamara Komersiu Industria Munisipiu Baukau, Estanislão Maria Quintas da Costa hateten, Timor Leste nia adezaun ba ASEAN ba setor privadu iha sinal la diak, tanba setor privadu barak iha Timor Leste seidauk iha kapasidade atu kompete iha merkadu ASEAN, maibe nuudar parseiru Governu apoiu Timor Leste nia adezaun ba ASEAN.
“Tuir ami nia fuan rasik karik ami hateten adezaun ba ASEAN iha diak iha mos ladiak, iha parte iha ami sente kondisaun ameasa nia laran, tanba adezaun ba ASEAN nee fo tantangan boot mai ami, maibe hakarak ga lakohi tenke infrenta,” Estanislão katak.
Mezmu Timor Leste nia adezaun ba ASEAN fo ameasa ba vida setor privadu iha rai laran, tanba emprezariu sira husi Nasaun membru ASEAN nian sei mai Timor Leste hodi halo investimentu kompete ho emprezariu Timor oan sira, Maibe hanesan Timor Oan sei prepara aan hodi kompete ho emprezariu sira husi rai liur.
Jornalista: Tomas Reis
Editora: Carme Ximenes
