BAUKAU, STLTIMORLESTE.com – Relasiona ho ema deskonhesidu neebe naok negosiante sira nia sasan iha merkadu Tuanau, Autoridade Munisipiu Baukau sei hatoo keixa ba Komando Polisia Baukau no planu sei destaka pesoal seguransa iha merkadu Tuanau.
Prezidente Autoridade Munisipiu Baukau, Veneranda Lemos hateten, kazu ema deskonhesidu naok sasan husi negosiante sira nia baraka iha merkadu foun Tuanau, mak iha loron 18 Marsu nee Autoridade Munisipal orienta ekipa Jestaun Merkadu ba terenu rekolha informasaun husi negosiante sira, nunee ekipa relata ona rezultadu ba Autoridade Munisipal foti asaun.
“Informasaun hatoo ba hau dehan katak, iha duni ema neebe laiha responsabilidade hakarak naok estraga ema nia sasan, ami sei relata ba polisia,” informa Veneranda ba STL iha Vila Antiga, Baukau, Kuarta (19/03/2025).
Tuir informasaun neebe iha, sasan neebe lakon husi negosiante sira nia baraka mak hanesan sapatu, roupa loja kompostu kalsa, faru no jaket inklui sasan nesesidade baziku sira neebe ho estimasaun ba orsamentu hamutuk US$ 1.500, nunee Autoridade Munisipal sei hatoo keixa ba parte polisia hodi bele haree asuntu refere, tanba kestaun fo prejuizu ba negosiante sira.
Asaun ema deskonhesidu naok negosiante sira nia sasan nee Autoridade Munisipiu kondena, tanba laiha responsabilidade hodi naok negosiante nia sasan iha tempu kuarezma.
“Hau la hatene tanba sa nee akontese, se uluk iha kraik moru laiha buat hotu diak hela, nusa mak agora iha moru laran bele akontese, maibe presiza seguransa ita tau iha neeba,” nia tenik.
Veneranda konfuzaun, antes negosiante sira halo negosiu iha merkadu tuan hanesan Vila Nova, Beskem no Vila Antiga laiha moru protesaun hodi asegura sasan iha tempu kalan laiha informasaun sasan lakon no atual koloka iha merkadu foun ho moru haleu, maibe sasan lakon, nunee sei destaka pesoal seguransa hodi apoiu no asegura negosiante sira nia sasan iha tempu kalan.
No sasan neebe lakon nia parte sente triste no konsidera asaun naok malu laiha responsabilidade husi ema inresponsabilidade sira.
“Hau husu ba komunidade no vendedores sira neebe halo atividade negosiu iha merkadu laran labele julga arbiru deit, presiza ita ho ita mos tenke haree malu, ita ba naok malu halo saida,” Nia realsa.
Veneranda husu negosiante sira iha merkadu Tuanau no komunidade sira iha Munisipiu Baukau tomak atu labele buka julga deit Autoridade Munisipal, maibe presiza tau matan ba sasan neebe iha.
Mezmu iha informasaun negosiante sira nia sasan lakon neebe kauza husi laiha seguransa no kestaun la autoriza negosiante kalan toba iha merkadu.
Maibe Autoridade Munisipal nafatin konsisten la autoriza negosiante kalan toba iha merkadu laran, tanba fatin merkadu laos atu toba, maibe tau sasan hodi faan, maibe tanba kauza husi la autoriza kalan toba iha merkadu no laiha seguransa mak ema deskonhesidu aproveita naok, Autoridade sei estabelese seguransa merkadu nian.
“Merkadu laos atu toba, merkadu tau ita nia sasan iha neeba, mais hau ba vizita iha merkadu laran ema habai ropa iha merkadu laran, nee susar ita atu organiza,” Veneranda deklara.
Nia konta, mezmu Autoridade Munisipiu la autoriza negosiante kalan toba iha merkadu, maibe husi observasaun nota, deskonfia negosiante kalan toba iha merkadu, tanba ropa neebe fase habai iha merkadu laran.
Deskonfia negosiante neebe kalan toba iha merkadu laran nee fo impaktu ba ordenamentu merkadu nian no la kontribui ba ijiene merkadu nian, nunee Autoridade nafatin la autoriza negosiante kalan toba iha merkadu.
Entretantu negosiante neebe faan iha merkadu foun Tuanau hamutuk 879 ho tipu negosiu obralan 148, roupa loja 125, faan sapatu 87, sembako 146, sasan dapur 54, kolisaun 10, alfateh 14, faan sana rai 3, tais timor 7, faan telefone 15, baber shop 5, sasan eletroniku 9, kosmetik 13, faan osan mean 1, faan pulsa EDTL 2, faan aimoruk ba agrikultura nian 1, Farmasia 1, faan naan karun no seluk tan 10, faan ikan 23, produtu lokal 200 no mini restaurante 7.
(tom)
