BAUKAU, STLTIMORLESTE.com – Autoridade Munisipiu Baukau liu husi ekipa konjunta sobu negosiante sira nia baraka iha merkadu foun Tuanau, tanba okupa espasu estrada difikulta movimentu transporte publiku no privadu sira asesu ba merkadu.
Negosiante obralan, Gabriela Mendonça sente triste, tanba iha loron 18 Abril 2025 ekipa konjunta husi Autoridade Munisipiu Baukau sobu baraka sira neebe negosiante sira harii, maibe antes nee Autoridade Munisipiu rasik la iha regras ba negosiante sira harii baraka, nunee negosiante sira idak-idak harii baraka, maibe ikus kontinua sobu, tanba razaun okupa estrada difikulta movimentu transporte publiku no privadu.
“Ami sente triste, tanba haruka ami mai tiha iha merkadu Tuanau ami idak-idak halo ami nia baraka, maibe agora sira mai sobu tan baraka barak,” hateten negosiante Gabriela Mendonça ba STL iha merkadu Tuanau, Kuarta (23/04/2025).
Negosiante nee rekonhese, sala harii baraka besik estrada, tanba nee ekipa konjunta sobu, maibe laiha fatin tetuk atu harii, maske merkadu Tuanau ho medida luan no fatin mamuk sei barak, maibe laiha finanseiru atu sosa rai mutin inklui rai henek hodi ateru fatin neebe sei mamuk hodi harii baraka halo negosiu.
Tanba nee husu Autoridade Munisipiu liu husi Servisu Jestaun Merkadu tenke organiza negosiante sira ho diak, liu husi ateru fatin sira neebe sei mamuk nunee negosiante neebe halo negosiu besik liu estrada bele muda hodi labele prejudika movimentu transporte, tanba tempu bazar iha loron kinta no Domingu sempre hamosu engarrafamentu iha merkadu Tuanau.
Nunee mos kondutor ba transporte publiku, Pedro Maria sublina, Autoridade Munisipiu Baukau la kria regras ba negosiante sira harii baraka, tanba nee negosiante sira idak-idak harii baraka no balun konsege okupa estrada hodi difikulta movimentu transporte publiku no privadu sira asesu iha merkadu Tuanau.
“Bazar iha nee sempre hamosu engarrafamentu too estrada boot neeba, maibe fatin iha kotuk luan hela, hau husu Autoridade Munisipiu Baukau sei bele ateru tiha para movimentu transporte bele hasoru malu, no ami mos husu Autoridade atu muda tan sira neebe halo baraka besik estrada nee,” Pedro sujere.
Nia husu Autoridade Munisipiu Baukau atu muda tan negosiante sira neebe harii baraka besik estrada no oriente harii iha fatin sira sei mamuk neebe dook husi estrada iha merkadu laran, nunee labele hamosu engarrafamentu, tanba daudaun tempu bazar iha loron Kinta no Domingu, pasajeiru barak atu asesu merkadu Tuanau, maibe falta kondisaun iha merkadu Tuanau hamosu engarrafamentu besik too area Hospital Rejional Eduardo Ximenes nian, nunee habaruk kondutor sira tula pasajeiru too merkadu Tuanau.
Liga asuntu nee, STL tenta konfirma Diretor Servisu Jestaun Merkadu Munisipiu Baukau, maibe seidauk bele fo komentariu, tanba sei inkomoda ho servisu seluk.
(tom)
