BAUKAU, STLTIMORLESTE.com – Autoridade Postu Administrativu Baukau Vila kolleita lis Lokanante neebe grupu fitun kuda iha Aldeia Uanioma, Suku Kaibada, Postu Baukau Vila, Munisipiu Baukau.
Administrador Postu Baukau Vila, Aires Correia agradese ba grupu Fitun neebe iha inisiativa kuda lis Lokanante, tanba hetan rezultadu diak neebe bele faan iha merkadu sei hetan rendimentu diak, tanba foin dahuluk kuda iha Postu Administrativu Baukau Vila.
Autoridade Postu nee rekonhese, durante ezistensia grupu refere servisu sira maioria manualmente, tanba nee Autoridade Munisipiu Baukau liu husi Autoridade Postu entrega hand traktor 100DL ba grupu refere hodi utiliza servisu ho diak.
“Ita too mai fatin haree duni rezultadu ita hotu haree ho matan, durante nee ita nia komunidade sira servisu deit hanesan nee sira husu ita nia ajuda liu husi Prezidente Autoridade ita fo hela traktor ba sira oinsa para bele hatutan moris,” hateten Aires iha Uanioma hafoin koilheta lis Lokanante, Kuarta (08/10/2025).
Iha fatin hanesan Xefe Grupu Fitun, Anibal Cardoso De Sá hateten, grupu fitun ezistensia ho total membru nain 20 no lis Lokanante kuda iha kantareiru medida 600 kuadradu hetan rezultadu diak, tanba durante nee hetan asistensia teknika husi extensionista no Organizasaun Naun Governamentais Tomak.
“Lis nee ami vivieru nia musan durasaun fulan ida depois ami kuda tempu panen fulan 3, lis ida nee liu fali lis lokal, tanba lokal nee produsaun ladun boot ida nee nia isin soe dook lis lokal nee, isin 4 US$ 0.50,” Anibal katak.
Xefe Grupu nee kompara, lis Lokanante ho lis lokal, lis Lokanante diak liu lis lokal, tanba lis Lokanante isin 4 ho folin US$ 0.50 enkuantu lis lokal futun boot folin US$ 0.50.
Nunee kompromete sei aumenta numeru produsaun lis Lokanante iha Suku Kaibada hodi responde ba ezijensia merkadu lokal, tanba Autoridade Munisipiu Baukau liu husi Autoridade Postu entrega ona ekipamentus fila rai neebe sei ajuda grupu hodi expanda area produsaun.
“Uluk ami fila rai ho liman, maibe agora daudaun sira fo hand traktor ida ba ami, ami sei loke luan fila fali area produtivu aumenta produsaun,” Anibal argumentu.
Nia espresa, komunidade Uanioma iha vontade servisu iha area hortikultura neebe kada fulan hetan prudusaun produtu lokal barak, maibe difikulta mak kondisaun estrada nunee difisil transporta ba faan iha merkadoria.
Tanba nee husu Autoridade Suku atu nafatin prioritiza kondisaun estrada husi Aldeia Uanioma ba area Vila Antiga nian nunee bele fasilita movimentasaun transporte hodi transporta komunidade hortikultura Uanioma sira nia produtu ba merkadu.
Hatan ba kestaun nee Xefe Suku Kaidaba Cosme da Costa Lopez rekoinhese kondisaun estreda husi Suku Kaibada ba Vila Antiga daudaun kondisaun aat, maibe Autoridade Suku nafatin halo koordenasaun ho Autoridade Postu no Munisipiu hodi haree asuntu refere, tanba Suku kaibada nuudar Suku urnaba iha Munisipiu Baukau Postu Baukau Vila.
“Preokupasaun boot liu ida mak iha Kaibada komunidade sira lori sai sira nia produtu lokal iha nee bemo halai mak Kinta Domingo deit labele halai loro loron tanba estrada, maibe planu hotu husi leten tun mai ita iha nee pedidu hatoo ba Postu ba Prezidente Autoridade ida nee mak ita halo kooperasaun,” katak Cosme
Lideransa Komunitariu nee relata, Suku Kaibada nuudar Suku urnaba nunee estrada fahe ona ba pakote rua, pakote ida kategoria estrada Munisipiu no pakote ida seluk estrada rural hamutuk kilometru 1, nunee nafatin husu Autoridade Postu no Munisipiu atu tau atensaun seriu hodi responde ba preokupasaun komunidade hortikultura sira nian iha Suku Kaidaba.
Jornalista: Tomas Reis
Editora: Carme Ximenes
