BAUKAU, STLTIMORLESTE.com – Autoridade Postu Administrativu Baukau Vila, lori festa 20 Maiu loron Restaurasaun Independensia ba dala 23 besik ba povu.
Administrador Postu Baukau Vila, Aires Fatima Correia hateten, durante selebrasaun loron nasionais importante sira, Autoridade Postu Baukau Vila hamutuk ho Autoridade Munisipal selebra deit resintu Administrasaun Autoridade Baukau, maibe festa 20 Maiu tinan nee, liu husi reuniaun Asembleia Postu Administrativu (ASPA) kompostu Suku 13 deside selebra loron Restaurasaun Independensia ba dala 23 iha Suku Gariuai, tanba objetivu lori festa nasionais sira besik ba komunidade hodi sente.
“Ami ses nee tanba iha razaun, loron boot sira hakarak halo ketak ho nia razaun povu sira sente karak 20 Maiu nee ba sira duni, tanba halo iha Munisipiu halo ba ita nia aan rasik, tanba nee Baukau Vila foti desizaun sees husi atividade, laos sees husi sevisu,” hateten Aires ba jornalista sira hafoin remata serimonia Isar bandeira iha Gariuai, Tersa (20/05/2025).
Nia sublina, kada festa nasionais sira neebe selebra deit iha nivel Munisipiu, komunidade iha baze la sente no la reflete loron importante sira, tanba nee liu husi ASPA deside ona sei selebra festa nasionais sira iha nivel Suku hodi fo oportunidade ba komunidade sira partisipa direita.
Nia fundamenta, selebra loron restaurasaun indepedensia ba dala 23, Autoridade Postu Baukau Vila hetan alokasaun orsamentu hamutuk US$ 1.000 no orsamentu refere la sufisiente, maibe Autoridade Postu hamutuk ho Autoridade Suku selebra loron importante refere hodi halibur komunidade, tanba hetan apoiu makaas husi kompanhia balun iha Baukau Vila.
“Hau agradese ba kompanhia, sein kompanhia atividade labele lao hanesan nee, tanba ita osan kiik US$ 1.000, maibe ajuda husi kompanhia neebe mak Munisipiu la presiza, entaun ita bolu sira, tanba sira kopera, maibe ita mak la bolu,” Aires argumentu.
Administrador Postu Baukau Vila nee akresenta, programa lori festa nasionais besik ba komunidade iha baze hetan apoiu finanseiru no seluk tan husi kompanhia balun iha Postu Baukau Vila, neebe durante nee Autoridade Munisipiu Baukau la presiza.
Komunidade Ana Maria Ximenes da Rosa sente kontente, tanba Autoridade Postu bele realiza festa nasionais iha nivel Suku hodi fo oportunidade ba komunidade sira partisipa no sente loron importante sira.
“Ami orgulhu tebes, tanba ida nee foin primeira vez Postu Baukau Vila realiza iha Suku Gariuai no fo oportunidade ba komunidade sira bele partisipa direita iha Isar bandeira nee,” Ana Maria katak.
Komunidade nee husu Autoridade Postu atu kontinua realiza festa nasionais sira iha nivel Suku, tanba importante ba komunidade sira atu partisipa hodi halo reflesaun na loron importante sira.
Entertantu festa nasionais loron restaurasaun indepedensia ba dala 23 neebe selebra iha Suku Gariuai, hetan partisipasaun masimu husi Autoridade Suku no komunidade sira husi Suku 13 pertense ba Postu Baukau Vila.
(tom)
