BAUKAU, STLTIMORLESTE.com – Autoridade Suku Fatulia, iha Postu Administrativu Venilale, Munisipiu Baukau, implementa ona projetu reabilitasaun estrada rural hamutuk kilometru (Km) 1 resin husi Aldeia Uaitobonu ba too Sede Suku Fatulia, ho valor orsamentu rihun US$ 38.
Xefe Suku Fatulia, Angelino Moisés Pereira esplika, relasiona alokasaun orsamentu husi PNDS ba tinan fiskal 2025 nian ba Suku Fatulia, Postu Administrativu Venilale, Autoridade Suku propoin ba programa reabilitasaun estrada rural, tanba bazeia planu prioridade Suku neebe aprezenta husi nivel Aldeia.
“Reabilitasaun nee fontes orsamentu mai husi PNDS US$ 38 mil responde ba kilometru ida ho balun husi Aldeia Uaitobonu tama too sede Suku Fatulia,” hateten Angelino ba jornalista sira iha Fatulia, Kuarta (23/07/2025).
Nia sublina, projetu reabilitasaun estrada refere ho distansia kilometru 1 resin neebe husi estrada Nasional Diresaun Baukau Vikeke iha area Uaitobonu too Sede Suku Fatulia rasik ho implementasaun reabilitasaun ba estrada refere, kompostu husi tipu cor beton, ateru, cor valeta metru 150 inklui cor deker.
Nia fundamenta, parte Suku aseita pedidu Aldeia hodi fo prioridade ba reabilitasaun estrada, tanba estrada mak sai alternativu no autodeteminasaun ba prosesu dezenvolvimentu liu husi ba movimentu komunidade sira nian bele asesu merkadu, eskola no seluk tan.
Progresu implemetasaun projetu refere hanesan servisu ateru remata ona no dadaun kontinua planu implementa servisu seluk neebe planeia ona nunee termina tuir kontratu neebe iha ho durasaun projetu fulan 3.
“Hau hanoin ida nee bele fasilita ona ita nia komunidade sira i aliende nee mos estrada nee hanesan estrada alternativu ba estrada Nasional husi Baukau ba Vikeke, iha tempu kotuk estrada Nasional nee aat, movimentasaun Vikeke liu husi nee,” Angelino akresenta.
Komunidade Uaitobonu, Domingos Basílio de Sousa hateten, antes nee komunidade sira husi Aldeia Uaitobonu ba Sede Suku Fatulia no husi Uaitobonu ba merkadu Venilale no fatin seluk tan ho transporte sira difikulta tebes movimentasaun, tanba estrada kondisaun aat, maibe sente kontente ho kondisaun estrada atual, tanba liu husi Orsamentu PNDS bele hahu rezolve ona komunidade Uaitobonu nia preokupasaun kona-ba kondisaun estrada durante nee.
“Hanesan komunidade sente orgulhu, tanba reabilitasaun estrada ida nee rezolve ona ami nia problema neebe mak baibain ami sente. Importante liu estrada nee fo benefisiu boot ba ami movimentasaun ba mai,” Domingos espresa.
Entretantu projetu refere implementa hetan fornesedor husi kompanhia lokal tolu, mak hanesan Manudare Unipesoal Lda fornesedor pezadu, Uatudaba fornesedor material lokal no fornesedor material fabrikadu husi kompanhia Feto Mesak neebe dadaun iha ona progresu no bainhira finaliza sei fo asesu ba Uma Kain husi Aldeia Uaitobonu hamutuk 286 komunidade seluk tan.
(tom)
