BAUKAU, STLTIMORLESTE.com – Autoridade Munisipiu Baukau koordena ona Servisu Rejistrasaun no Verifikasaun Emprezarial, Institutu Publiku (SERVE.IP), atu la aumenta numeru Xineza halao negosiu iha Baukau.
Prezidente Autoridade Munisipiu Baukau, Veneranda Lemos rekonhese, Timor-Leste adopta sistema merkadu livre, tanba nee sidadaun estranjeiru sira bele halo negosiu iha Timor-Leste liu liu iha Munisipiu Baukau, maibe halo negosiu ho investimentu boot atu nunee emprega Timor oan sira neebe hakarak servisu, laos mai iha Timor-Leste liu liu iha Munisipiu Baukau loke fali loja no kios hodi kompete ho emprezariu Timor oan sira. Tanba nee Autoridade Munisipiu Baukau koordena ona SERVE.IP atu la fo lisensa tan ba Xineza sira atu halo negosiu iha Munisipiu Baukau.
“Iha leten neeba nee ami bolu tiha ona laiha ida mak atu mai loke tan nee laiha ami mos koalia tiha ona ho SERVE la fo tan lisensa ami tenke hatene, Autoridade tenke hatene halo kontrolu imajina naran Autoridade laiha kontrolu saida mak ida nee Munisipiu nee atu ba neebe, labele,” Veneranda hateten ba STL, iha salaun apuramentu, Vila Nova, Baukau, Tersa (28/10/2025).
Nia rekonhese, daudaun komunidade estranjeiru liu liu Xineza sira halo negosiu liu husi loke loja iha Munisipiu Baukau besik 10, maibe nee prezensa iha Baukau hahu kedas iha tinan hirak ba kotuk, tanba nee Autoridade Munisipiu fo ona atensaun ba Xineza refere atu la bolu tan ona nia maluk sira prezensa tan iha Baukau hodi loke tan loja foun iha Baukau.
Maibe Autoridade Munisipiu Baukau simu no fo lisensa mak ba Xineza neebe iha kapital boot atu halo investimentu hodi emprega Timor oan sira liu liu Baukau nia oan, maibe prezensa iha Baukau mak hakarak deit loke loja Autoridade Munisipiu sei taka.
“Agora iha nee la liu 10 nee loke antes tiha ona, ita dehan ba sira imi atu loke tan, imi bolu malu tan mai loke buat boot se loke buat kiik oan hanesan mos maluk Baukau oan sira halo loja ami taka tiha tanba laiha vantajen, ekonomia lao hanusa se ita rasik hanesan Autoridade la projete hamate tiha sira ekonomia lao hanusa, Baukau oan halo negosiu ita tenke proteje,” Veneranda argumenta.
Too notisia nee publika STL seidauk halo konfirmasaun ho SERVE.IP Munisipiu Baukau, tanba okupadu.
Jornalista: Tomas Reis
Editora: Carme Ximenes
