BAUKAU, STLTIMORLESTE.com – Autoridade Suku Loilubu, Postu Administrativu Vemasi, Munisipiu Baukau konsidera, programa Bolsa da Mae neebe inisia husi Ministeriu Solidariedade Sosial no Inkluzaun (MSSI) fo subsidiu ba labarik estudante sira hamosu diskrimisaun.
Xefe Suku Loilubu, Joanico da Costa Freitas preokupa ho trara programa Bolsa da Mae iha Suku Loilubu, tanba programa refere koalia kona-ba labarik estudante sira nia eskola no estudu, nunee iha suku Loilubu labarik estudante barak tuir ona intervista ba programa refere, maibe barak laiha hetan direitu ba programa refere, tanba la hetan subsidiu.
“Programa Bolsa da Mae ita sente diskrimisaun boot ida nuudar Autoridade ema hanoin dehan halo diskriminasaun ba komunidade mais realidade nee nia problema iha Governu, tanba ate a data sira foun nafatin laiha dalan asesu Bolsa da Mae nee,” hateten Joanico ba STL, liu husi telefone, Segunda (15/09/2025).
Xefe Suku nee sublina, tempu intervista nian kauze labarik estudante sira neebe husi familia kondisaun vuneravel deit mak partisipa no husi Xefe familia ida aprezenta labarik estudante liu nain 4, maibe too ikus simu subsidiu balu la hetan direitu.
Nia fundamenta, preokupasaun refere antes nee pontu fokal sira iha nivel Munispiu rekoinhese ona atu solusiona, maibe too ohin loron seidauk iha rezultadu.
“Hanesan Autoridade Suku preokupa asuntu nee, ida nee mak Lideransa Suku han panka boot, tanba ami bolu sira ba tuir intervista mais naran la sai, maibe ami nee hanesan fonte nain hotu hotu atu fasilita nee Ministeriu Solidariedade Sosial,” Joanico argumentu
Autoridade Suku Loilubu nee husu Ministeriu Kompetente no Diresaun Munisipal sira atu tau atensaun ba kestaun refere, tanba viola labarik estudante vuneravel sira nia direitu ba subsidiu refere.
Liga asuntu nee jornalista STL tenta konfirma Diretor Servisu Munisipal Edukasaun Baukau no Sentru Solidariedade Sosial Munisipiu Baukau, maibe laiha fatin atu fo komentariu, tanba halao hela servisu balun iha fatin seluk.
Jornalista: Tomas Reis
Editora: Carme Ximenes
