MAUBISSE, STLTIMORLESTE.com – Autoridade Lokal Munisipiu Ainaro kontinua preokupa ho kondisaun estrada iha area remotas neebe la diak, difikulta movimentu povu lori sira nia produtu ba merkadu.
Informasaun nee hatoo husi Xefe Suku Aitutu, Gregorio Lopez Perreira dehan, observasaun serbisu husi IX Governu konstitusional, oras nee lao diak teb-tebes, liga ba insfraestrutura baziku estrada ba area rural, liu husi Programa Nasional Dezenvolvimentu Suku (PNDS) atu rezolve problema iha suku sira, estrada liga ba aldeia, neebe sei aat.
“Ita haree PNDS iha Suku Aitutu lao kapas teb-tebes, iha mos programa neebe halao husi parseiru dezenvolvimentu sira hanesan SAPIP parseiru ho Plan Internasional, ajensia lokal Sira hanesan Maharo halo kooperasaun ho autoridade lokal Aitutu, tau prioridade no forma grupo kooperativa, Dezenvolve foin sae sira liu husi rai osan no impresta isan.
“Ida nee programa diak atu dezenvolve hau nia komunidade sira, ba sira nia nesesidade neebe importante, nunee sira mos sente dezenvolvimentu neebe lao iha rai laran, liu-liu hau Nia komunidade suku Aitutu,” dehan nia.
Iha fatin hanesan, Xefe Suku Manelobas, Julio P. Tilmau dehan, Suku Manelobas suku ida neebe izoladu tebes iha Postu Administrativu Maubisse, Munisipiu Ainaro.
“Hau hakarak koalia uluk lai konaba insfraestrutura hanesan estrada, suku Manelobas hanesan suku ida neebe izoladu teb-tebes iha Postu Administrativu Maubisse, kompostu husi Suku 9 iha Munisipiu Ainaro. Ita haree husi dezenvolvimentu husi Governu nomos Organizasaun non Govermentais Sira. Insfraestrutura neebe Lao dadauk iha suku, implementa husi PNDS, iha tinan 2025, orsamentu neebe aloka ba Suku Manelobas Liu husi PNDS hamutuk US$ 28.000 ital, ida nee sei labele responde preokupasaun Komunidade,” dehan Xefe Suku Manelobas.
Nia haktuir tan katak, insfraestrutura neebe lao iha ninia suku, estrada aat tebes-tebes, difikulta komunidade nia movimentu iha tempu uda. Lori sira nia produtu ba merkadu tanba estrada la diak.
Ho preokupasaun nee, husu ba Governu atu tau matan ba kestaun estrada boot ba area rurais tanba kada tinan produtu barak mak povu produs maibe produtu sira nee estraga deit tanba kondisaun estrada la diak.
Ami nafatin iha Esperansa ba Governu atual neebe lideradu husi Maun Boot Primeiru Ministru (PM), Kay Rala Xanana Gusmao atu hadia estrada ba tok area remotas suku Manelobas, tanba Fatin nee alende iha produtu Agrikultura iha mos sitiu turistiku neebe furak hodi atrai turista lokal no estranjeiru atu vizita Fatin nee hodi fo retornu ekonomia ba estadu,” dehan Juliao.
Relasional ho preokupasaun nee, Prezidente da Republika, José Ramos Horta mos husu ba Governu atu tau matan ba povu Nia preokupasaun Kona ba kondisaun estrada tanba Modo ho aifuan neebe sirkuka iha merkadu Dili neeba Mai husi Mambae oan Sira iha Aileu, Ainaro, Ermera no Manufahi.
“Hau hanoin nesesidade baziku liu ba povu mak estrada, governu tenke tau matan ba estrada iha area rurais sira atu mobiliza sira nia produtu ba merkadu,” dehan PR Horta iha ambitu dialogu iha rotunda Maubisse neebe organiza husi Media Tatoli, apoiu husi Governu liu husi Sekretáriu Estadu Komunikasaun (SEKOMS), Expedito Dias Ximenes.
Jornalista: Joseph Koa
Editor: Joseph Koa
