LAGA, STLTIMORLESTE.com – Selebrasaun loron mundial bee moos ba dala 33, tinan nee Autoridade Munisipiu Baukau husu ema hotu hadomi bee matan.
Reprezentante Prezidente Autoridade Munisipiu Baukau, atual Sekretaria Munisipiu ba Asuntu Sosial no Organizasaun, Maria Viegas hatete, selebrasaun loron mundial bee moos monu iha loron 22 Marsu no iha loron 22 Marsu 2025 selebra ba dala 33, neebe Autoridade Munisipiu Baukau selebra iha Suku Werumata, Postu Administrativu Laga, hodi implementa atividade hanesan kuda ai oan iha bee matan Werumata objetivu atu proteje bee matan
“Ita selebra loron mundial dala 33 fo motivasaun ba inan aman sira iha baze ita hotu hamutuk hadomi ita nia bee matan sira liu husi protesaun kuda ai oan,” hateten Maria Viegas, iha Werumata, Sesta (21/03/2025)
Nia dehan, selebrasaun loron mundial tinan nee, Autoridade Munisipiu husu atu komunidade sira iha baze hadomi bee matan sira liu husi kontribui la estragus aihun sira neebe eziste iha bee matan no husu atu kontinua konserva bee matan liu husi kuda ai oan iha fatin bee matan sira hodi proteje bee matan labele maran no dura ba tinan naruk.
Nia akresenta, bee moos nesesidade importante ba vida humanu no ba edifisiu publiku sira atu asesu, nunee selebrasaun loron mundial bee moos iha Suku Werumata Autoridade Munisipiu servisu hamutuk ho Diresaun Florestal Munisipiu Baukau, prepara ai oan hamutuk 500 resin neebe kuda hodi konserva bee matan.
“Ita prezisa proteje aihun bele moris no husi moris aihun sira bele asegura bee hodi fo moris mai ita no bee bele forsa iha bailoron, tanba iha fatin-fatin bailoron bee sempre menus, bee menus impaktu husi ita sira tesi ai arbiru no sunu rai arbiru,” nia fundamenta.
Maria katak, atu projete bee matan sira iha Munisipiu Baukau, liu husi reuniaun Konselhu Konsultivu Munisipal neebe realiza iha loron 20 Marsu nee, Prezidente Autoridade Munisipiu fo ona orientasaun ba Autoridade Postu ualu (8) no Suku 62 atu identifika bee matan sira hotu iha nivel Suku hodi relata ba munisipiu fo protesaun kuda ai oan hodi konserva ezistensia bee matan dura ba tinan hodi fo moris ba komunidade no ba jerasaun sira iha futuru.
Administrador Postu Laga, João Freitas de Castro hatete, nia parte simu ona informasaun husi Autoridade Munisipiu, nunee sei hamutuk ho Autoridade Suku hodi identifika bee matan sira iha Postu Laga hodi haree volume bee, bainhira bee menus sei relata ba Autoridade Munisipiu hodi koordena ho parte relevante koloka ai oan bele konserva.
“Bee matan neebe mak ami proteje kuda ai oan, ho ekipa ami ba haree tiha ona, presiza proteje no konservasaun, tanba bailoron bee menus, ba seluk hanesan Autoridade agradese ba programa nee,” nia argumenta
Autoridade Postu nee agradese, tanba selebrasaun loron mundial bee moos nian, Autoridade Munisipiu hili Suku Werumata hodi selebra ba dala 33 liu husi kuda ai oan konserva bee matan Werumata.
Enkuantu tuir informasaun neebe STL rekolha, bee matan neebe Autoridade Munisipiu Baukau konserva iha Suku Werumata, tanba aihoris neebe moris besik iha bee matan ho tipu hanesan ai-kasi, ai-kakeu no seluk tan neebe sei menus, nunee apoiu tan ai oan liu 500 neebe apoiu husi Florestal, kompostu hali, mahoni, niamplon, au no seluk tan.
(tom)
