BAUKAU, STLTIMORLESTE.com – Autoridade Lokal Uato-Haco, Postu Administrativu Venilale, Munisipiu Buakau husu Ministeriu Agrikultura Pekuaria Peska no Florestas (MAPPF), tetu projetu konstrusaun irigasaun Galata, neebe planeia atu inaugura iha fulan Agostu nee.
Xefe Suku Uato-Haco, Crisostomo Correia haktuir, Koordenador Servisu Munisipal Agrikultura neebe destaka iha Postu Administrativu Venilale avizu ona ba Autoridade Suku Uato-Haco inklui Suku vizinhu seluk tan, neebe benefisiu ba irigasaun Galata atu prepara hodi inaugura projetu irigasaun Galata iha tempu badak. Maibe Autoridade Suku nee preokupa, tanba kompanhia neebe responsabiliza ba projetu refere seidauk loke bee ba natar.
“Projetu nee dehan atu inaugura iha Agostu nia laran, nee mak hau hateten responsabilidade seidauk husik bee iha terenu hein lai, kuandu sira halo ona teste loke bee ita haree nia korente bee nia debit lao oinsa, oras ida nia kona hektares hira, depois ita sukat ba bailoron bee nee too ga lae, ita haree tiha ida nee mak inagura, laos halo tuir ita nia hakarak inaugura tiha se mak responsabilidade ba ida nee,” hateten Crisostomo ba jornalista STL liu husi telefone, Kuarta (13/08/2025).
Kestaun inaugura projetu nee tuir nia laos preokupasaun boot, tanba kada projetu ida neebe konstrusaun remata ona sempre hahu ho seremonia inagurasaun hafoin ba faze utilizasaun, maibe Autoridade Suku nee hakarak, kompanhia implementador projetu refere tenke loke uluk bee ba natar sira neebe benefisiu ba irigasaun nee, prezisa hatene debitu bee nia kobre natar hektares ida ho nia durasaun tempu no sukat bee nia forsa responde natar sira iha tempu bailoron.
Aleinde nee mos iha fulan hirak liu ba irigasaun nee iha barajen balu monu, tanba kauza husi udan no daudaun parte kompanhia sei reabilita hela, maibe tenta atu inagura ona.
Autoridade Suku nee mos sujere, presiza haree kondisaun sira nee hotu aliende mos tenke orienta kompanhia responsabiliza projetu refere loke bee uluk ba natar sira hafoin hakat ba faze inaugurasaun, tanba natar neebe benefisiu ba irigasaun refere seidauk asesu bee.
Entretantu tuir nota informativu neebe STL asesu, projetu konstrusaun irigasaun Galata responsabiliza husi kompanhia internasional China Civil Engineering Construction Corporation ho valor orsamentu milhaun US$ 14 husi fundu infraestrutura, neebe irigasaun refere fo asesu bee ba natar hamutuk hektare 600 no uma kain 750 husi Postu Administrativu Venilale, Matebian no Postu Ossu Munisipiu Vikeke balu.
(tom)
