BAUKAU, STLTIMORLESTE.com – Autoridade lokal iha Suku Buruma, Postu Administrativu Baukau Vila, Munisipiu Baukau, husu Ministeriu Edukasaun (ME) solusiona problema iha setor edukasaun.
Tuir Xefe Suku Buruma, Liborio dos Santos Freitas katak, problema neebe akontese iha eskola ensinu baziku primeiru-segundu no terseiru siklu Buruma mak hanesan laiha moru protesaun, menus kadeira no meza ba estudante, laiha biblioteka inklui profesores ba estudante pre-eskolar laiha.
Nia esplika, edifisiu eskola publiku Buruma atual iha sala aprendizajem ba estudante sufisiente, maibe laiha moru protesaun fasil ba ema deskonhesidu atu estragus no pre-eskolar funsiona durante tinan lima, maibe laiha profesores permanente, tanba nee parte inan aman estudante mak kontribui osan hodi fasilita profesor kada fulan.
Aleinde mos kondisaun edifisiu eskola publiku Buruma haree husi liur, parede nabilan, maibe haree husi laran meza kadeira ba estudante sira kuaze aat hotu ona, tanba parte eskola kontinua utiliza deit husi Governu Indonezia nian rai hela iha tempu okupasaun.
“Problema sira nee ami hatoo ba Ministeiru Edukasaun bele mos ba oin tau atensaun no oinsa mak servisu hamutuk rezolve problema edukasaun,” rekomenda Xefe Suku Buruma, Liborio dos Santos Freitas ba Ministra Edukasaun, Dulce de Jesus iha serimonia inaugurasaun edifisiu Pre-Eskolar Buruma, Segunda (24/03/2025)
Hatan ba kestaun nee, Ministra Edukasaun Dulce de Jesus hateten, kona-ba konstrui moru protesaun Ministeriu Edukasaun sei haree kondisaun eskola sira iha territoriu nasional neebe maioria sei aat, nunee husu inan aman sira voluntariu kontribui harii moru protesaun hodi proteje fasilidade sira.
Maibe kona-ba fasilidade hanesan meza kadeira neebe sai preokupasaun ba estudante sira iha eskola publiku Buruma, Ministeriu sei responde iha tempu badak, tanba ekipa haree ona konsdisaun meza kadeira ba neebe prezisa fo apoiu.
“Ekipa husi Ministeriu tama ba sala laran sira haree duni, laiha meza no kadeira Ministeriu sei responde ba ida nee, kona-ba lutu hau sei la responde, tanba ita sei haree ba kondisaun eskola neebe sei aat,” Dulce hateten
Nia sublina, kona-ba profesores menus ME sei haree fali ba kuadru pesoal hodi hatene eskola Buruma prezisa aumenta profesores ou lae, tanba dala ruma profesores sira la hanorin 24 horas kada semana hodi fo impaktu ba menus profesores, maibe lo-loos kada profesores hanorin 24 horas.
Nunee Autoridade Suku no Komunidade sira prezisa kontrola profesores sira hodi hatene, profesores sira tama tuir oras ou lae, tanba la tama tuir oras fo impaktu ba estudante sira, tanba la kumpri 24 horas kada semana.
(tom)
