BAUKAU, STLTIMORLESTE.com – Autoridade lokal iha Postu Administrativu Vemasi, Munisipiu Baukau, husu Ministeriu Saude (MS) atu destaka mediku iha Postu Saude Uaigae.
Xefe Suku Uaigae, Gaudensio C. Soares esplika, pesoal saude neebe Ministeriu Saude kolaka iha Postu Saude Uaigae hamutuk nain rua, kompostu enfermeira no parteira neebe difikulta ba komunidade seluk bainhira enfrenta moras la nesesariu ho pesoal saude nain rua refere nian servisu, bele fo impaktu ema nia saude, tanba distansia Suku Uaigae ba Sentru Saude Vemasi no Hospital Rejional Baukau dook.
“Fasilidade Saude iha Uaigae, iha enfermeira ida perteira ida, ita haree presiza aumenta tan doutor ida, karik iha moras espesifiku, atendimentu nee ema espesifiku mak hatene bainhira iha moras kroniku ruma,” hatene Gaudensio ba STL iha Vila Nova, (26/03/2025)
Tuir nia, iha fasilidade Postu Saude sira inklui hanesan iha Postu Saude Uaigae iha deit pesoal saude nain 2 posibilidade iha impaktu ba atendimentu, tanba bainhira entre pesoal saude sira nain rua, ida lisensa iha tempu neebe komunidade presiza, nee bele hamosu impaktu ba komunidade neebe atu trata saude.
Nunee tuir Xefe Suku nee katak, prezisa aumenta tan pesoal saude liu-liu mediku jeral hodi bele atende komunidade sira ba kualker moras bainhira entre pesoal saude nain rua ida lisensa.
Diretor Servisu Saude Munisipiu Baukau, Cristiano Cipriano Belo hateten, Postu Saude Uaigae atual iha parteira ida no enfermeira ida, maibe antes nee mos iha pesoal mediku, tanba daudaun lisensa hodi kontinua estudu.
Tuir nia, nee la fo impaktu ba atendimentu iha Postu Saude refere, tanba atendimentu kontinua lao neebe asegura husi enfermeira no parteira.
“Ita haree lai nia posibilidade atendimentu kada loron nee hira, tanba iha neeba aldeia rua deit, maibe iha nee mos difikulta ba mediku, tanba too agora mediku laiha,” hateten Cristiano.
Diretor nee konsidera Postu Saude Uaigae nia kobrementu ba asuntu saude nian, atende deit aldeia rua (2) iha Uaigae, nunee laiha impaktu, maibe bainhira haree atendimentu kada loron ba komunidade sira moras barak, iha posibilidade bele destaka mediku, maibe mediku iha Servisu Saude Munisipal menus, tanba iha tinan 2023 hetan kolokasaun nain lima (5) no koloka ona ba fasilidade saude neebe nia kobertura ba populasaun barak.
Nunee mediku nain lima (5) neebe koloka ba Servisu Saude Baukau, kontinua kedas koloka ba fasilidade saude iha Suku Saelari, Makalaku, Bualale, Lavateri inklui Suku Gariuai.
“Ami mos iha posibilidade atu rekruta area mediku nian, maibe ema mak la hakarak atu mai, entaun labele halo buat ida,” Cristiano argumenta.
Diretor nee relata, fasilidade saude sira iha Munisipiu Baukau barak mak seidauk iha pesoal mediku, nunee servisu saude hakarak halo rekrutmentu, maibe sidadaun neebe remata ona estudu ba area mediku nian, laiha vontade atu tuir vaga, nunee seidauk bele responde.
Maibe laos laiha mediku iha fasilidade saude hodi fo impaktu ba atendimentu, maibe sei bele halo atendimentu ba komunidade pasiente sira, tanba iha enfermeira no parteira neebe nafatin fo asistensia kuidadu saude primaria iha baze.
(tom)
