DILI, STLTIMORLESTE.com – Polísia Nasionál Timor Leste (PNTL) koordena ho Autoridade Lokal no Igreja, hodi regulariza sira iha dalan publiku no kada bairu, nunee labele viola ema seluk nia direitu.
Hatete Xefe Departamentu Investigasaun Kriminal Nasional (DIKN), Superintendente João Belo dos Reis ba jornalista sira, iha Komando Jeral PNTL, Dili, Kinta (05/12/2024).
Nia dehan, prejepiu sira neebe mak halo iha dalan publiku no kada bairu nee tenke halo tuir lei neebe iha, nunee labele halo perturbasaun ordem publiku.
“Ita regulariza prejepiu sira tantu iha estrada publiku no kada bairu sira nunee labele viola ema seluk nia direitu. Tanba ema balun hakarak deskansa, balun neebe moras no bebe oan sira,” nia esplika.
Nia informa, iha prejepiu sira nee la autoriza hemu tua toka muzika neebe mak laiha relasaun ho loron natal nian.
No husu ba inan aman sira atu labele sosa fugetes ba oan sira hodi sunu arbiru, bainhira deteka sei halo prosesu ba inan aman.
Entretantu Xefe Suku Kaikoli, Hipolito Sarmento hatete, regulariza prejepiu sira nee importante tebes hodi halo prevensaun ba violensia.
“Ita haree iha tinan kotuk akontese joven sira baku malu iha prejepiu, tanba kauza husi konsumu alkohol,” nia deklara.
Nia esplika, tanba nee parte Polísia no Autoridade lokal sira koordena hamutuk ho parte Igreja, nunee bele regulariza joven sira halo prejepiu katak labele besik liu iha estada, labele okupa trotoar no labele hemu tua, halo barulhu iha prejepiu.
(jen)
