BAUKAU, STLTIMORLESTE.com – Autoridade Administrasaun Munisipal orgulhu ho atitude komunidade sira, ba selebrasaun durante loron finadu iha Munisipiu Baukau.
Lia murak nee hatoo husi Prezidente Autoridade Munisipiu Baukau, Veneranda Lemos bainhira realiza komunikadu imprensa iha resintu Administrasaun Munisipal Vila Nova, Kuarta (06/11/2024)
“Autoridade Munisipal Baukau sente orgulhu tebes ho komunidade tomak nia atitude, jestu hodi garante seguransa durante selebrasaun, nunee ema hotu, familia hotu-hotu bele partisipa iha selebrasaun nee ho trankuilidade,” dehan nia.
Veneranda konsidera, atitude komunidade sira nian neebe halao ona durante selebrasaun loron finadu nee, nuudar papel fundamental promove dame no harmonia hodi kontribui ba iha prosesu dezenvolvimentu.
Tanba durante selebrasaun eventu refere komunidade Munisipiu Baukau tomak hatudu espiritu tradisaun kultural no relijioza neebe asegura situasaun lao ho hakmatek hodi permite ema hotu fo onra ba matebian sira ho dignidade no respeitu.
“Tanba nee, hau konvida ita boot sira hotu atu hamutuk ho Autoridade Munisipál fó liman ba malu harii munisípiu ida iha ne’ebé prevalese respeitu, pas no solidariedade ba malu,” nia tenik.
Nia argumenta, Autoridade Munisipal kontinua servisu hamutuk ho entidade hotu hodi promove ambiente neebe seguru no akolidu hodi garante liu tan pas no estabilidade iha Baukau.
Unidade mak xave ba dezenvolvimentu, tanba nee sei kolabora no dialogu nakloke mak bele ultrapasa obstakulu sira neebe insuperavel no fo solusaun inovadora sira ba problema iha sosiedade.
“Dala ida tan hakarak agradese imi hotu, partikularmente ba inan aman sira hotu no joven sira hotu nia kontribuisaun, no hein katak ambiente neebe ita sente daudaun loron hirak liu ba, sei sente mos iha ita idak-idak nia hakat, iha ita nia komunidade hahu husi ohin ba oin,” nia sujere
Aleinde mos Veneranda agradese ba Komando Polisia Nasional Timor Leste Munisipiu Baukau no FALINTIL Forsa Defeza Timor Leste neebe halo operasaun konjuntu hodi garante seguransa ba selebrasaun refere.
Iha fatin hanesan, Komando Polisia Munisipiu Baukau, Superintendente Xefe Polisia Antonio Maria De Sa kontratula atitude jovem sira nian durante selebrasaun loron finadu, tanba la hamosu insidente hodi perturba ordem publiku.
“Ida nee sai referensia diak ba ita hotu, tanba nee agradese ba komunidade hotu nia maturidade no disiplina ita laiha kazu durante finadu,” nia relata
Tuir nia, eventu finadu tinan 2024 la hanesan ho tinan hirak ba kotuk neebe sempre mosu konfrontasaun entre jovem sira, tanba kondisaun lanu, maibe iha tinan nee primeiru vez akontese Munisipiu Baukau Baukau selebra finadu ho hakmatek.
Tanba nee kontinua enkoraja komunidade sira iha Baukau, liu liu jovem sira atu nafatin hakat husi ritmu finadu nian neebe nakodu ho domin, tanba la hamosu konfrontu hanesan tinan hirak liu ba, iha eventu hanesan.
(EST 2)
