BAUKAU, STLTIMORLESTE.com – Autoridade Munisipiu Baukau ofisialmente fo pose ba estrutura Konselhu Munisipal Protesaun Sivil (KMPS), iha Postu Administrativu Vemasi.
Reprezentante Prezidente Autoridade Munisipiu Baukau, atual Sekretaria Munisipal Asuntu Sosial Maria Viegas esplika, estabelesimentu estrutura KMPS iha Postu Vemasi bazeia ba diploma ministerial Nu.85/2023, loron 29 Dezembru iha artigu 50 kona-ba misaun Diresaun Munisipal Servisu Protesaun Sivil no Gestaun Dezastre Naturais nomos tuir baze legal KMPS husi lei protesaun Nu.12/2020, loron 02 Dezembru iha artigu 28 fo kompetensia ba Autoridade Munisipal halo asoens prevensaun ba Dezastre Naturais no seluk tan liu husi ekipa KMPS sira.
“Hanesan tomada pose baze legal oinsa mak atu halao servisu, iha knaar lubuk ida neebe eziste iha Munisipiu too mai iha Postu atu halao servisu bainhira iha akontesementu dezastre nian sira tenke tau atensaun,” hateten Maria Viegas hafoin remata seremonia tomada pose ba estrutura KMPS iha Vemasi, Kinta (01/05/2025).
Nia sublina, estrutura KMPS iha Postu Vemasi hetan ona formasaun durante loron tolu, neebe hahu husi loron 27-30 Abril 2025, iha ona kapasidade atu apoiu servisu atende komunidade sira bainhira infrenta problema dezastre naturais.
Nia fundamenta, servisu neebe estrutura KMPS iha nivel Postu Administrativu atu halo mak, rekolha dadus husi komunidade afetadu sira hodi relata ba Autoridade Munisipiu no Autoridade Protesaun Sivil iha nivel Munisipiu, nunee bele aselera apoiu emerjensia ba komunidade afetadu sira.
“Estrutura neebe estabelese ona husu sira para oinsa atu ativu apoiu masimu ba atividade Postu nian liu-liu dezastre ruma neebe akontese tenke urujetimente halibur hamutuk relata ba Munisipiu,” Maria Viegas rekomenda.
Koordenadora Jeral ba Konselhu Munisipal Protesaun Sivil Postu Vemasi, Elda Maria Viegas de Sousa Freitas hateten, estabelesementu estrutura Konselhu Munisipal Protesaun Sivil no hetan ofisializa liu husi pose, mak sai baze ba membru sira hodi halao knaar diak liu tan hodi atende komunidade afetadu ba dezastre naturais.
“Hau hanoin, hau nia membru sira hatene ona sira nia knaar, tanba hetan ona formasaun loron tolu nian, husi estrutura nee bele haforsa liu tan servisu iha terenu,” katak Elda Maria.
Nia hateten, estrutura KMPS iha nivel Postu Vemasi preparadu atu ezekuta servisu, tanba hetan ona formasaun durante loron tolu.
Elda Maria katak, servisu neebe atribui ba estrutura KMPS mak atu reduz risku dezastre naturais iha Vemasi, rekoilha dadus husi komunidade sira bainhira afeta dezastre naturais hodi relata ba Autoridade Protesaun Sivil nunee aseleta apoiu emerjensia.
Entretantu serimonia tomada pose nee ba estrutura Konselhu Munisipal Protesaun Sivil nain 20 nuudar funsionariu publiku husi linhas Ministeriu neebe destaka iha Postu Administrativu Vemasi.
(tom)
