BAUKAU, STLTIMORLESTE.com – Tinan 2026 nee Autoridade Munisipiu Baukau sei konstrui fatin refetori iha nivel eskola atu fasilita estudante sira asesu programa merenda eskolar.
Diretor Servisu Munisipal Edukasaun Baukau, Afonso dos Santos da Costa hateten, grupu responsabilidade ba programa merenda eskolar iha Munisipiu Baukau hamutuk 35 neebe too ohin loron grupu balu sei falta dapur no grupu 35 seidauk iha refetori atu fasilita estudante sira asesu diak liu tan iha programa merenda eskolar.
“Refetoriu tomak ida 35 grupus nee hotu hotu laiha dapur mak iha netin durante nee ita fiar deit iha inan aman prepara fatin tein, agora daudaun uza mak ida nee iha Baukau ita foin iha dapur 10, i planu ida hau rona atu halo tan 10 resin hanesan nee kompletu ho refetori ho kozinha hamutuk atu tau iha eskola 7 ou 8 ida hanesan nee,” hateten Afonso dos Santos da Costa ba jornalista sira iha Vila Nova Baukau, Tersa (20/01/2026).
Nia katak, fatin refetori ba estudante sira Autoridade Munisipiu Baukau sei konstrui ho orsamentu anu fiskal 2026 neebe aloka ona ba Programa Nasional Dezenvolvimentu Nasional (PNDS) Munisipiu Baukau.
Nia sublina, preparsaun ba konstrusaun refere, Servisu Munisipal Edukasaun Baukau halo ona identifikasaun ba eskola sira no iha ona preparasaun dadus ba implementasaun.
“Eskola sira neebe hamutuk hanesan Primeiru Siklu, Segundu Siklu no Terseiru Siklu nee sira identifika ona ida neebe hamutuk, mais hanesan eskola vila nova keta-ketak nee seidauk,” Afonso katak.
Too notisia nee publika, STL seidauk halo konfirmasaun ho Diretor PNDS Munisipiu Baukau, tanba okupadu.
(tom)
