BAUKAU, STLTIMORLESTE.com – Deskonfia Autoridade Munisipiu Baukau lakohi asina nota insentivu Suku Bahu nian, nunee Prezidente Autoridade Munisipiu Baukau, Veneranda Lemos responde katak, nee la loos.
Liu husi publikasaun identidade Facebook Deckhy Kusuma, atual Xefe Suku Bahu nia deklarasaun neebe STL asesu iha loron 20 Marsu 2025 katak, Prezidente Autoridade Munisipiu Baukau lakohi asina slip ou nota ba osan insentivu husi Suku Bahu sein razaun hafoin Suku aprezenta ba Autoridade Munisipal iha loron 19 Marsu tinan nee.
Nunee iha loron 20 Marsu nee STL tenta hasoru Xefe Suku Bahu iha Rotunda Vila Antiga, maibe Xefe Suku Bahu Manuel F. R. Gusmão lakohi fo komentariu, tanba razaun atu halo konfirmasaun hikas ba Autoridade Munisipal.
Hatan ba kestaun nee, Prezidente Autoridade Munisipiu Baukau, Veneranda Lemos hateten, relasiona publikasaun informasaun iha rede sosial husi identidade Facebook, Deckhy Kusuma nee la loos.
“Nee bosok no la loos, ida nee dun matak deit, hodi bainhira mak autoridade ida la asina slip, slip nee importante lalaok suku nian, hau husu Xefe Suku Bahu atu labele ataka beibeik autoridade iha media,” hateten Veneranda ba jornalista sira iha salaun apuramentu Baukau, Kinta nee (20/03/2025).
Prezidente Autoridade nee hateten, tuir lo-loos Autoridade Suku sira liu-liu Suku Bahu lalebe kritika Autoridade Munisipal iha media sosial, maibe iha dalan atu fo solusaun ba preokupasaun sira, tanba bele kontaktu direita ou aprezenta iha reuniaun importante sira hanesan iha reuniaun Konselhu Konsultivu Munisipal.
Maibe Autoridade Suku Bahu hakarak sai fali opozisaun ba Autoridade Munisipal sein razaun klaru.
“Se mak fo informasaun dehan lakohi asina, Xefe Suku lubuk ida iha nee fo sira nia afirmasaun, Suku balu mos seidauk asina,” Veneranda argumenta.
Nia akresenta, relasiona nota insentivu husi Suku Bahu neebe hatete katak Autoridade Munisipal seidauk asina, husi Suku seluk mos Autoridade Munisipiu seidauk asina, maibe sei asina, tanba slip ou nota insentivu Suku nian importante ba funsionamentu suku, maibe Xefe Suku Bahu hakarak duun matak.
“Medida depois mak ita haree, medida sira nee iha hotu, dezobedensia mos iha, Konselhu Suku mak tenke rezolve, tanba hau la kontra ema ida,” nia realsa.
Venerada dehan, hafoin simu mandatu nuudar Prezidente Autoridade ba Munisipiu Baukau seidauk kontra Autoridade Postu, Suku nomos komunidade sira, nunee asaun Xefe Suku Bahu iha medidas atu responde, maibe prefere liu ba Konselhu Suku Bahu atu rezolve, tanba tuir lei iha regras dezobedensia nian atu haree hahalok Autoridade Suku hasoru nivel munisipiu.
Entretantu Suku neebe eziste iha Baukau hamutuk 62, enkuantu nota ou slip insentivu 20 resin Autoridade Munisipiu fo ona asinatura no seluk seidauk, maibe sei asina tuir kondisaun iha tempu badak.
(tom)
