BAUKAU, STLTIMORLESTE.com – Autoridade Munisipiu Baukau seidauk koloka pesoal seguransa iha merkadu Tuanau, hodi asegura negosiante sira nia sasan iha tempu kalan.
Negosiante roupa loja, Cedelizio Baptista Freitas Fraga hateten, sente triste ho politika Autoridade Munisipiu Baukau neebe inisia muda negosiante sira husi merkadu tuan Vila Antiga, Beskem no Vila Nova ba merkadu foun Tuanau, maibe too ohin loron seidauk koloka pesoal seguransa hodi asegura negosiante sira nia sasan iha tempu kalan no negosiante sira kalan la toba iha merkadu, tanba bandu husi Autoridade Munisipiu.
“Too ohin loron seguransa laiha halo ami sente triste, tanba ami nia sasan barak mak lakon no sira nia promesa nee promesa falsu hodi bosok deit ami,” hateten Cedelizio ba STL iha merkadu Tuanau, Segunda nee (07/04/2025)
Negosiante nee konta, durante politika Autoridade Munisipiu Baukau la koloka pesoal seguransa iha merkadu Tuanau, maibe bandu negosiante sira kalan toba iha merkadu laran tuir idak-idak nia fatin negosiu.
Tanba nee husi loron 17 Marsu tinan nee ba kotuk, ema deskonhesidu konsege naok ona negosiante sira nia sasan hanesan sapatu, roupa loja kompostu kalsa, faru no jaket inklui sasan nesesidade baziku sira sura ba osan hamutuk rihun US$ 1.500.
Nia argumenta, mezmu Autoridade Munisipiu Baukau bandu negosiante sira kalan la toba iha merkadu, maibe negosiante sira deside kontra asaun bandu, tanba laiha seguransa, nunee negosiante sira kalan tenke toba iha merkadu hodi hein sasan idak-idak nia fatin negosiu.
“Ami tenke kontra regras munisipiu bandu kalan toba iha merkadu, ami kalan toba iha nee, tanba laiha seguransa, maibe ami hakarak rekomenda ba munisipiu, se bele karik monta seguransa,” Cedelizio sujere.
Negosiante Mateus Fernandes husu ba Autoridade Munisipiu Baukau atu koloka pesoal seguransa iha merkadu Tuanau, maibe la hatan kona-ba rekomendasaun nee, sei fo oportunidade ba ema deskonhesidu sira atu naok sasan, tanba laiha seguransa.
Liga asuntu nee, STL tenta konfirma Diretor Servisu Jestaun Merkadu Munisipiu Baukau, maibe seidauk fo komentariu, tanba laiha knaar fatin.
(tom)
