BAUKAU, STLTIMORLESTE.com – Autoridade Postu Baguia husu Governu atu konstrui ponte foun hodi substitui ponte tuan iha mota Gomilafa, Postu Administrativu Laga, Munisipiu Baukau.
Administrador Postu Baguia, Mario Xavier da Silva esplika, ponte refere iha mota Gomilafa lokaliza iha baliza entre Suku Atelari Postu Laga no Suku Lavateri Postu Baguia neebe konstrui iha tempu okupasaun Indonezia hodi fasilita movimentasaun transporte publiku no privadu, maibe iha loron 15 Marsu nee parte ponte sorin monu, tanba rai mamar.
“Nia monu nee kuaze metru 5 hanesan nee, hela rohan hanesan nee, liu liu nia penahan nee mak hetan estragus, ponte nee monu fo impaktu ba ita nia movimentasaun transporte publiku nia viajen husi Baguia mai Baukau, husi Baukau ba Baguia,” Administrador Postu Baguia, Mario Xavier da Silva hateten ba STL iha Vila Nova Baukau, Tersa (17/03/2026).
Nia haktuir, durante ponte refere nia sorin monu difikulta tebes movimentasaun transporte publiku no privadu diresaun husi Postu Administrativu Baguia ba Baukau Vila, maibe liu husi koordenasaun Autoridade Postu ba kompanhia responsabiliza projetu reabilitasaun estrada Laga-Baguia hodi halo normalizasaun no dadaun nee movimentasaun transporte publiku no privadu hahu lao diak asesu ponte refere.
Maibe Administrador Postu Baguia nee argumentu, normalizasaun refere sei la utiliza ba tempu naruk, tanba nee Governu presiza halo konstrusaun ponte foun hodi substitui ponte tuan iha mota refere.
“Sim ponte nee importante tebes atu halo, husu ba Governu para bele tau atensaun ba ita nia ponte nee rasik,” Mario Xavier da Silva rekomenda.
(tom)
