BAUKAU, STLTIMORLESTE.com – Autoridade Postu Administrativu Kelikai Antigu, Munisipiu Baukau, la konsege loke hikas odamatan Sede Suku Uaitame.
Odamatan Sede Suku Uaitame komunidade sira rasik mak taka iha loron 11 Dezembru 2025, tanba la satisfas ho rezultadu votasaun liu husi Konselhu Konsultivu Munisipal (KKM) Baukau neebe realiza iha loron 09 Dezembru 2025 ho votus 33 deside Suku Uaitame hamutuk ho Postu Administrativu Kelikai Antigu.
Odamatan Sede Suku Uaitame kuaze taka fulan ida hodi implika ba servisu Administrasaun Suku Uaitame nian, tanba funsionariu Suku nain 4 neebe Governu rekruta hodi destaka iha Suku refere labele halo servisu inklui Konselhu Suku sira.
Nunee iha loron 15 Janeiru 2026, Prezidente Autoridade Munisipiu Baukau, Veneranda Lemos orienta Administrador Postu Kelikai Antigu, Francisco Matias Gusmão “Junior” atu loke hikas odamatan Sede Suku Uaitame no iha loron 18 Janeiru Administrador refere hamutuk ho Polisia too kedas iha Sede Suku Uaitame atu loke hikas odamatan Sede Suku, maibe la konsege, tanba impede husi komunidade sira.
“Iha loron 18 nee Administrador ho Polisia mai sede Suku Uaitame atu sobu odamatan Suku Uaitame, maibe la konsege loke tanba komunidade sira iha sede Suku hakilar haklalak, nunee nia la konsege loke odamatan Sede Suku nian,” hateten komunidade Uaitame, Bartolomeu Moreira ba STL liu husi telefone, Kinta (22/01/2026).
Nia konsidera, prezensa Administrador Postu Kelikai Antigu iha Sede Suku Uaitame atu loke hikas odamatan Sede Suku nuudar asaun buka problema, tanba administrador refere ba loke odamatan ho safenda iha loron Domingu.
Tuir Bartolomeu katak, loloos Administrador iha ninia pozisaun kumpri postura Administrador nian, laos tun direira halo asaun sobu odamatan Sede Suku neebe taka husi komunidade sira, tanba lakohi atu hamutuk ho Suku seluk iha Postu Kelikai Antigu.
“Dalan legal nee laos solusaun husi asaun neebe Administrador Postu Kelikai Antigu mai halo, maibe tuir loloos solusaun neebe mak diak tenke tuir dalan dialogu ho komunidade sira,” Komunidade nee espresa.
Nia komenta, husi asaun neebe Administrador Postu Kelikai Antigu halo iha sede Suku Uaitame seidauk iha solusaun hodi loke hikas odamatan Sede Suku Uaitame, tanba daudaun nee odamatan Sede Suku kontinua taka neebe permanente hein husi komunidade sira iha Sede Suku oin.
Bartolomeu rekoinhese, asaun taka odamatan Sede Suku Uaitame fo impaktu ba atendimentu Suku nian ho komunidade, maibe asaun taka odamatan sede Suku nuudar meius ida atu fanu ukun nain sira nia hanoin ba destinu Suku Uaitame nian, tanba dezisaun neebe iha la tuir komunidade sira nia hakarak.
“Ba ami nia pedidu retirasaun husi Kelikai Antigu submete ona ba Autoridade Munisipiu Baukau, Vise Primeiru Ministru, Ministeriu Administrasaun Estatal, Sosiedade Sivil ho tan Provedoria Direitus Umanus nian,” nia informa.
Bartolomeu garante katak, husi pedidu retirasaun neebe komunidade Suku Uaitame submete ona ba entidades sira sei iha solusaun ba komunidade Uaitame nia hakarak pertense iha Postu Kelikai.
Liga asuntu Autoridade Postu Kelikai Antigu prezensa iha Sede Suku Uaitame, maibe la konsege loke hikas odamatan Sede Suku mak iha loron 19 Janeiru 2026 iha resintu salaun apuramentu Vila Nova Baukau, STL tenta komfirma Administrador Postu Kelikai Antigu, Francisco Matias Gusmão “Junior”, maibe lakohi fo komentariu.
(tom)
