BAUKAU, STLTIMORLESTE.com – Autoridade Postu Administrativu Laga realiza desportu komunitariu, hodi selebra loron 28 Novembru tinan nee, iha Munisipiu Baukau.
Deklarasaun nee hatoo husi Prezidente Komisaun Organizadora ba eventu desportu komunitariu iha Postu Laga, atual Komadante Polisia Eskuadra Postu Laga, Duarte B. Ximenes Soru ba jornalista sira, iha serimonia abertura jogu futebol iha Kampu futebol, Gariuai, Soba Laga, Tersa (22/10/2024).
“Jogu amizade ida nee kompleta loron nasional 28 Novembru nian, no jogu ida nee mos joven sira atu kria unidade pas entre Suku ho Suku hodi sai belun diak liu tan iha Postu Administrativu Laga,” dehan Duarte.
Jogu nee tuir nia katak, Autoridade Postu hamutuk ho entidades seluk implementa atu kompleta selebrasaun loron 28 Novembru tinan nee, nomos kria lasu amizade entre joven sira husi Suku ida ba Suku seluk atu konhese malu diak liu tan, hodi kontribui prosesu dezenvolvimentu iha Postu Laga.
Aleinde hanoin seluk mos atu prepara fini desportiva neebe diak husi selesaun desportu komunitariu ba kompete iha Nasional nomos internasional, tanba jovem talentu desportiva liu liu ba area futebol nian, husi Postu Laga maioria inklui ona klube Munisipal neebe kompete ona iha eventu nasional.
“Kopetisaun ida nee rejistu Suku 8 inklui Suku foun Werumata hamutuk 9, neebe klube hamutuk 15 ho sistema jogu setengah kompetisi, too dia 26 Novembru remata” Duarte fundamenta
Prezidente Komisaun Organizadora nee akresenta, orsamentu ba desportu komunitariu hodi selebra loron refere, preve husi Autoridade Munisipal liu husi Autoridade Postu neebe sei aloka ba eventu futebol, voleibol, dada tali inklui sae bua hun.
Iha fatin hanesan, jogadores husi Suku Werumata, Grigorio da Costa Ribeiro sente kontenti ho eventu refere, konsidera Autoridade Postu no Munisipal fo espasu ba foinsae sira iha Postu Administrativu Laga hodi espresa talentu futebol nian.
“Hau konsidera jogu nee mos importante ba ami foinsae sira atu kria amizade entre Suku ho Suku,” nia espresa
Reprezentante foinsae Suku Werumata nee argumenta, desportu komunitariu laos kompete hodi buka manan, maibe desportu komunitariu mak dalan uniku atu responsavel desportiva Munisipal bele identifika fini futebol neebe kualidade hodi reprezentante Munisipiu ba kompete iha Nasional.
(EST 2)
