BAUKAU, STLTIMORLESTE.com – Autoridade Postu Administrativu Laga, Munisipiu Baukau, selebra loron reflesaun Masakre Santa Cruz 12 Novembru hamutuk ho komunidade Suku Atelari.
Administrador Postu Laga, João Freitas de Castro esplika, Postu Laga iha Suku 9 inklui Suku foun Werumata, nunee autoridade postu desidi kada selebrasaun loron nasional sira rotativamente iha suku hirak refere hodi komunidade, liu-liu joven sira bele hatene istoria husi loron importante sira hodi kontribui iha prosesu dezenvolvimentu.
“Importansia liu nee mak ami Autoridade hanoin oinsa ita atu relembra fila fali ita nia Maun, Aman sira nia luta neebe mak iha tinan hirak ba kotuk, sakrifika vida tomak ba libertasaun rai ida nee,” hateten João ba jornalista sira iha ambitu selebra loron 12 Novembru iha Suku Atelari, Tersa (12/11/2024).
Nia sublina, importansia husi selebrasaun loron 12 Novembru ba dala 33 nee, mak dala atu motiva sidadaun hotu atu relembra hikas ba akontesimentu iha tempu pasadu sira, neebe Timoroan barak mate iha ai-laran no vila laran, tanba hakarak TL livre husi okupasaun.
Autoridade Postu nee informa, selebrasaun loron Masakre ba dala 33 neebe Autoridade Postu inisia iha Suku Atelari hodi anima komunidade hodi reflete ba loron importante nee mak hanesan siminariu, selebra misa hodi fo omenajen ba eroi 12 Novembru no kari ai-fuan ba Saudozu Augusto Ximenes iha semiteriu publiku daramata Atelari, tanba saudozu refere hetan tiru parte kabun, bainhira involve iha demostrasaun santa kruz.
Nia sublina, orador prinsipal iha seminariu loron reflesaun Masakre Santa Cruz nee husi Padre Parokia Laga neebe foku ba papel Igreja nian iha loron loron 12 Novembru, no orador seluk nuudar auto ba demostrasaun ba Masakre Santa neebe realiza iha Dili.
João espresa, materia husi seminariu neebe orador sira aprezenta bele sai referensia diak ba sidadaun sira iha Postu Laga, liu-liu Atelari oan hodi kontribui ba programa Governu nian hodi atinji ba liberta povu.
Iha fatin hanesan, foinsae husi Aldeia Sirilaku Suku Atelari, Ambrogio Ximenes konsidera, loron importante ba jovem sira atu halo reflesaun hodi reflete hikas fali ba asaun neebe joven sira kontribui ba Timor nia luta, liu husi demostrasaun neebe realiza iha loron 12 Novembru 1991 Santa Kruz Dili, hodi hasoru Governu Indonezia neebe konsege jovem barak lakon vida.
Total orsamentu neebe gastus ba eventu refere hamutuk US$ 600.00 neebe aloka husi Ministeriu Juventude Desportu Arte no Kultura.
(EST 2)
