BAUKAU, STLTIMORLESTE.com – Liu husi sorumutu Assembleia Postu Administrativu (ASPA) Autoridade Postu Administrativu Matebian, Munisipiu Baukau fo prioridade ba programa tolu (3) ba Orsamentu Jeral Estadu (OJE) 2026.
Sorumutu Assembleia Postu Administrativu, Autoridade Postu Matebian realiza bazeia ba Orientasaun husi Ministeriu Administrasaun Estatal ho despaisu Nu. 02/M-MAE/1/2025 kona-ba indentifikasaun nesesidade prioridade tuir Programa Dezenvolvimentu Integradu Munisipal (PDIM) ba 2026 nian.
“Reuniaun Postu Matebian iha projetu tolu mak ami haruka mai PDIM, ida bee moos atu fo asesu ba komunidade sira, segundu halo moru protesaun ba sede suku Laisorulai de baixo i terseiru dala ba edifisiu Postu Matebian nian,” hateten Administrador Postu Matebian, Domingos Pereira ba jornalista STL iha Vila Nova, Baukau, Segunda (28/04/2025).
Nia esplika, prioridade tolu neebe indika, dahuluk sei kanaliza bee moos husi bee matan Dauaduka iha Suku Lelalai sei kanaliza ba uma kain hamutuk 8.527 iha Suku lima hanesan, Suku Lelalai, Laisorulai de Baixo, Laisorulai de Cima, Maluru no Abo, tanba durante tempu udan, komunidade iha uma kain balun konsumu udan been no bailoron lao distansia dook foin asesu bee moos.
No prioridade daruak sei konstrui moru protesaun ba sede Suku Laisorulai de Baixo, tanba proposta husi Suku, maibe sei deside iha reuniaun Munisipal.
Enkuantu prioridade datoluk, ASPA fo mos prioridade ba kondisaun estrada dirasaun ba edifisiu Postu Matebian ho distansia metru 600, tanba dadaun grave, iha neebe tempu udan difikulta movimentu transporte.
“Proposta tolu ami haruka mai nee, PDIM sei tun ba halo survey lai, tanba proposta nee ba 2026 nian,” Domingos Pereira akresenta.
Propostu tolu neebe Autoridade Postu Matebian relata ba Programa Dezenvolvimentu Integradu Munisipal sei ajusta iha proposta orsamentu Munisipal 2026, maibe nia impletasaun depende ekipa Programa Dezenvolvimentu Integradu Munisipal halo ona survei.
(tom)
