BAUKAU, STLTIMORLESTE.com – Autoridade Postu Administrativu Laga, Munisipiu Baukau, preokupa ho kondisaun Ponte Laga neebe daudaun nee aat.
Tuir informasaun husi Administrador Postu Laga katak, prosesu reabilitasaun estrada Baukau-Lautem, Governu liu husi Ministeriu Obras Publiku (MOP) kontratu kompanhia Internasional Sinoma, iha neebe prosesu reabilitasaun estrada Baukau-Lautem too iha area Postu Administrativu Laga kuaze remata ona no kompleta ona nia asesoria sira tuir estrada, maibe iha ponte 2 no pasadeira 1 kontinua difikulta movimentu transporte publiku no privadu sira.
“Ami preokupa loos mak ponte Laga Vila nee, mezmu konstrusaun estrada lao tiha ona, maibe parte Obras Publiku seidauk tau matan ba ponte sira nee,” hatete Administrador Postu Laga, João Freitas de Castro ba jornalista sira iha Laga, Kuarta (20/11/2024).
Ponte nee tuir nia utiliza ona tinan barak, tanba konstrusaun iha tempu okupasaun Indonezia neebe too iha tinan hirak ba kotuk hetan kuak iha klaran, neebe ameasa fo impaktu ba movimentu transporte boot sira.
Hafoin haree kondisaun ponte refere, Autoridade Postu diriji karta ba parte Obras Publiku, maibe relasiona ho prosesu reabilitasaun estrada Baukau-Lautem neebe iha, ponte sira neebe eziste la inklui ba projetu refere.
Nunee parte kompanhia Simona ho ekipamentus hanesan besi taka netik ona kuak refere hodi fasilita transporte sira, maibe motorista sira neebe utiliza motor ho movimentu ansi foti husi parte ninin, balun konsege hetan kanek, tanba besi neebe tau iha parte ninin balun miik.
Ligadu asuntu nee jornalista STL tenta konfirma Diretor Servisu Obras Publiku Munisipiu Baukau, maibe laiha fatin atu fo komentariu.
Enkuantu ponte neebe tuir observasaun jornalista STL nian iha terenu nota seidauk halo kontrusaun no reabilitasaun mak hanesan Ponte Seisal, Laga no pasadeira 1 lokaliza iha area Uaiaka mos seidauk hetan reabilitasaun, nunee tempu udan mota boot difikulta tebes movimentu transporte sira husi Munisipiu Lautem no Postu Baguai, Kelikai inklui Laga.
(EST 2)
