AMBENO, STLTIMORLESTE.com – Governu Autoridade Rejiaun Administrativa Espesial Oecusse-Ambeno (RAEOA) liu husi Diresaun Rejional Teras Propriedade serbisu Kadastru Oecusse, iha loron Segunda (29/12/2025), hahu halao lansamentu pagamentu ba komunidade afetadu sira ba projetu alargamentu estrada no infraestrutura ba Dezenvolvimentu Oecusse-Ambeno husi tinan 2015 too 2025 iha area Oecusse vila.
Serimonia lansamentu pagamentu ba komunidade afetadu ba projetu alargamentu estrada husi Sakato Suku Nipane, Cutete, Costa, Lifau, Cunha no Lalisuk, realiza iha salaun Convensoens 1 de Maiu Palaban, Suku Costa Postu Administrativu Pantemamasaar, Oecusse vila, lansa husi Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu, akompanha husi Diretor Rejional Teras Propriedade Serbisu Kadastru, Jose Ase Neno ho Diretor rejional sira hotu, lideransa komuntariu sira nomos komunidade afetadu sira.
PA-RAEOA, Regio da Cruz Salu ba STL iha Salaun Konvensoens 1 de Maiu Palaban Oecusse dehan, nudar PA-RAEOA louva laran osan mean povu Oecusse neebe husik sira nia rai hodi Estadu halao dezenvolvimentu, tanba nee agradese no husu deskulpa foin mak selu povu nia direitu ba rai iha Oecusse.
“Ita louva familia boot sira iha Oecusse sira nia pasiensia, mesmu prosesu nee iha tinan 7 nia laran, Autoridade RAEOA, tinan nee foin maka ita realiza. Hau ho kolega sira iha estrutura nee, iha obrigasaun atu kontinua inisia husi Autoridade RAEOA sesante, Rogerio Tiago de Fatima Lobato nia tempu ho Sekretariu Rejional Teras propriedade no Serbisu Kadastru sesante, neebe hahu prosesu deliberasaun ida neebe para atu selu, tanba nee ohin ita realiza,” dehan PA-RAEOA, Regio da Cruz Salu ba STL hafoin halo pagamentu ba komunidade afetadu hafoin halao lansamentu iha Oecusse.
Nia haktuir tan katak, ba oin espera labele husik problema tuan sira atu kontinua nafatin, tanba kuaze tinan 7 maka foin halo pagamentu, ida nee problema ida neebe akontese durante tempu barak kona ba kazu rai afetadu sira iha Oecusse, sai isu nasional too final, sai atensaun ba governu liu-liu ukun nain sira hahu husi Avo Mari nia tempu, Arsenio Paixao Bano, Jose Luis Guterres, Rogerio Tiago de Fatima Lobato nia tempu sempre halo situasaun neebe ladun furak too ohin maka foin pagamentu tanba kestaun desizaun governu.
“Hau hanoin, pagamentu sei kontinua akontese hodi liberta rai no espasu hirak neebe governu utiliza ba nesesidade ema barak nian iha Oecusse, tanba nee apresia ho povu Oecusse nia pasensia, ohin hahu rezolve ona, no ba futuru sei kontinua halo pagamentu tuir prosesu neebe maka iha,” afirma nia.
Iha biban nee, Diretor Rejional Teras Propriedade no Serbisu Kadastru, Jose Ase Neno informa katak, ohin Autoridade RAEOA, hahu halao lansamentu pagamentu ba komunidade afetadu sira neebe maka sofre husi projetu neebe maka halao iha RAEOA, liu-liu alargamentu Estrada husi Fronteira Sakato, too Tono, projetu seluk hanesan Otel Oe-upu, Sentru Eletrisidade Sakato no uluk atu halo 200 uma iha Bairru Cae, maibe oras nee dadaun governu halo kedan pagamentu atu nunee hahu harii uma iha neeba.
“Hau atu hateten katak, prosesu pagamentu ba rai afetadu sira, ida nee prosesu ida neebe maka naruk tebes, hahu kedan husi tinan 2015 too 2025 maka ita foin halo prosesu pagamentu, tanba nee agradese ba esforsu tomak husi PA-RAEOA ho Finansas, la too deit fulan 1, konsege loke ona konta bankaria ba benefisiarus sira no ohin realiza pagamentu liu husi konta bankaria neebe parte finansas fasilita ita nia komunidade sira, tinan kotuk halo pagamentu ho manual, maibe tinan nee halo pagamentu liu husi bankaria sira,” dehan nia.
Tuir informasaun neebe STL asesu katak, Autoridade Rejiaun Administrativa Espesial Oecusse-Ambeno, Liu husi Diresaun Rejional Teras Propriedade Serbisu Cadastru Oecusse, ofisialmente halao Lansamentu ba Pagamentu rai Afetadu ba benefisiariu Projetu iha Oecusse-Ambeno, hamutuk 107 afetadu ho total orsamentu tuir proposta hamutuk US$ 601.590,50 no total pagamentu hamutuk US$ 591.184,40 governu selu diretamente liu husi konta bankaria komunidade afetadu sira neebe loke ona sira nia konta bankaria iha banku.
Jornalista: Joseph Koa
Editor: Joseph Koa
