PASABE, STLTIMORLESTE.com – Autoridade Rejiaun Administrativa Espesial Oecusse-Ambeno (RAEOA) liu husi Assesoria asuntu Sosial, Agustinho Caet hamutuk ho Ekipa, iha loron Tersa (2/9/2025) apoiu foos hamutuk sakas 30 ba komunidade Aldeia Naetuna Suku Abani, Postu Administrativu Pasabe, Oecusse, tanba hatama proposta ba Autoridade RAEOA apoiu ai-haan ba sira hodi reabilita sira nia estrada rural ho distansia 800 metrus.
Tuir Assesoria Asuntu Sosial, Prezidente Autoridade Rejiaun Administrativa Espesial Oecusse-Ambeno, Agustinho Caet ba STL iha Aldeia Naetuna, Suku Abani, Postu Administrativu Pasabe, RAEOA, Tersa (2/9/2025), ohin lori foos ba benefisiariu sira husi Komunidade Aldeia Naetun hamutuk uma kain 30 neebe maka hatama sira nia proposta ba PA-RAEOA antes nee, hodi halao serbisu reabilita sira nia Estrada besik 1 KM, sira serbisu maibe voluntariu maibe husu apoiu aihan.
“Ohin ita mai iha aldeia Naetuna hodi responde proposta husi komunidade Naetuna neebe hatama ona sira nia proposta atu reabilita sira nia Estrada rurais besik 1 KM, tanba nee ita fo apoiu foos ba sira atu motiva sira hodi hadia sira nia Estrada, atu nunee bele utiliza hodi halo movimentu transporte publiku iha sira nia aldeia rasik neebe potensial ho produtu holtikultura hanesan modo oi-oin no fresku neebe sira kuda iha sira nia bairru laran, atu lori ba merkadu,” dehan nia.
Nia haktuir tan katak, liu husi apoiu foos ida nee tanba sira finaliza ona serbisu reabilita sira nia Estrada rural husi Suku Usi Taqueno nia rohan tama too sira nia bairru laran iha Aldeia Naetuna, Suku Abani, nunee ohin lori foos nee ba sira atu responde sira nia proposta tanba remata ona sira nia serbisu no sira la husu osan, husu deit maka aihan tanba tinan nee iha Pasabe, udan been makaas liu, sira failha kolheta.
Iha oportunidade hanesan, Xefe aldeia Naetuna, Antonio Sila dehan, sira foti inisiativa reabilita Estrada rurais tanba besik udan monu rai, entaun iha bairru laran organiza malu hodi hadia rasik.
“Hadia Estrada nee, ami mak hakarak rasik, depois mak ami husu apoia ruma husi Asesor Asuntu Sosial, ami la husu osan, maibe ami husi ajuda deit ai-han atu nunee ami bele reabilita Estrada nee, tanba iha estrada boot, agora Governu hadia hela ho ateru, entaun iha bairru laran ami mos kontribui ho fuan, labele buat hotu ejize ba Governu, maibe nuudar sidadaun ita mos tenki kontribui ba dezenvolvimentu, tanba ita rasik mak sei uza no asesu atu bele halo movimentu,” dehan nia.
Nia haktuir tan katak, iha sira nia aldeia nee potensial teb-tebes ho hortikultura hanesan kuda modo oi-oin maibe sira nia Estrada maka ladiak, tanba nee sira husu husu apoiu foos husi governu hodi hadia sira nia Estrada atu fasilita ema neebe maka hakarak sosa modo, bele asesu Estrada diak.
Tuir observasaun STL iha Aldeia Naetuna, Assesoria Asuntu Sosial RAEOA, Agustinho Caet involve direitamente hodi apoiu komunidade kee rai, nunee povu taka kuak iha Estrada, hafoin ida nee hamutuk ho Xefe Aldeia Naetuna no ekipa ofisialmente entrega aihan hanesan foos 25 kilogramas neebe fornese husi WFP tau ho logo RDTL, entrega direitamente ba benefisiariu sira iha Naetuna hamutuk uma kain 30 neebe involve direitamente hadia sira nia Estrada rural nee.
Jornalista: Joseph Koa
Editor: Joseph Koa
