DILI, STLTIMORLESTE.com – Governu Autoridade Rejiaun Administrativu Espesial Oekusi-Ambeno (RAEOA) liu husi Konselhu Administrasaun Fundu Infraestrutura (KAFI) da-tolu ba Oekusi, halo konstrusaun ba Kapela Antigu Santa Reliqui ho montante osan US$ 136.000 ital, manan husi Kompanhia Relicitra Unipessoal, Lda, daudaun kompanhia hamoos ona fatin no kee daudaun fondasi.
Diretor Regional das Infraestrutura, Remigio Nuno Sila liu husi telephone ba STL Tersa (18/03/2025) katak, iha semana kotuk nia ho Assessor Prezidente Autoridade Rejional Adminstrativa Espesial Oekusi-Ambeno (PA-RAEOA), Asuntu Sosial, Agustinho Caet ho Administrador Postu Administrativu Nitibe, Agustinho Afulit nomos Xefe suku Beneufe, ho Estrutura Kapela refere, Xefe Departementu Edifikasaun inklui ekipa tekniku husi DRI no Komunidade sira iha halo teste ba material konstrusaun kapela Santa Reliqui neebe maka kontrui husi Kompanhia Relicitra.
Diresaun Rejional Infraestrutura RAEOA dehan liu husi ekipa laboratoriu, iha semana kotuk ba teste rai ba konstrusaun Kapela Santa Reliquia iha Postu Administrativu Nitibe, Suku Bene-Ufe Aldeia Citrana.
“Iha Semana kotuk hau ba vizita trabalhu iha Postu Adminstrativu Nitibe, Suku Beneufe, vizita Kapela Santa Reliqui iha Aldeia Citrana, ita atu halo konstrusaun foun ba iha kapela nee rasik tanba kapela antigu neebe mak harii husi ita nia komuidade rasik, kontribui husi komunidade rasik maibe too tempu ida nee liu husi Prezidente Autoridade RAEOA, aproveita tempu ida nee tanba kontribuisaun husi komunidade mos labele ona, entaun husi komunidade Citrana liu husi Autoridade, DRI simu proposta atu oinsa harii Kapela Santa Reliqui nee,” dehan nia.
Diretor DRI, Remigio Nuno Sila hateten, Diresaun Regional Infraestrutura RAEOA liu husi ekipa laboratoriu hamutuk ho Kompanhia Relicitra Unipessoal Lda, teste rai no oinsa bele hatene rai nia kondisaun, kona-ba konstrusaun Kapela Santa Reliqui no daudaun nee kompanhia hahu hamoos rai no hahu kee ona fondasi.
Konstrusaun foun ba Kapela Santa Reliki ho montante US$ 136.000 ital, ho ninia medida ba kapela nee 9×26 metru, osan nee mai husi Konselhu Administrasaun Fundu Infraestrutura (KAFI) Rejional da-tolu ba Oekusi.
“Ita banati deit dezenhu anterior tuir deit medida Kapela Santa Reliqui neebe maka uluk komunidade sira harii ona nee,” dehan nia.
Iha biban nee, Diretor Regional Infraestrutura RAEOA, husu ba Kompanhia Relicitra atu hahu serbisu ona, mobiliza Material no monta ona estaka ba konstrusaun Kapela Santa Reliqui.
Iha biban nee, Jestor Postu Administrativu Nitibe, Agustinho Afulit hateten, hanesan Autoridade Postu Administrativu Nitibe, sente orgulhu no kontente tanba Governu Autoridade RAEOA tau osan hodi harii konstrusaun ba Kapela Santa Reliqui.
“Hau hanesan Autoridade Postu Administrativu Nitibe ho komunidade tomak sente iha Nitibe, orgulhu ba inisiativu husi Autoridade RAEOA liu husi DRI, nomos guvernu sentral liu husi IX governu Konstitusional Lideradu husi Primeiru Ministru (PM), Kay Rala Xanana Gusmão neebe ho inisiativu hodi apoiu ba konstrusaun Kapela Santa Reliquia, Tanba tinan barak ona Kapela nee la diak. Komunidade hateten, ami agradese ba Autoridade RAEOA liu husi DRI no ekipa tomak durante nee sira mos esforsu no la taka matan, neebe konhesudu iha Timor maka Santa Reliqui.
(jos)
