PASABE, STLTIMORLESTE.com – Prezidente Autoridade Rejiaun Administrativu Espesial Oecusse-Ambeno (PA-RAEOA), Regio da Cruz Salu akompanha husi Koordenador Zona Ekonomika Espesial ba Dezenvolvimentu Oecusse-Ambeno (ZEEDOA), Hercolanu de Sousa, Diretor Rejional Infraestrutura, Remigio Nuno Sila, Diretor Rejional Agrikultura, Jose Oki ho Diretora Finansas PNDS Nasional, Reprezentante Sekretariu Ezekutivu PNDS Nasional Aplonia L.L. de Araujo hamutuk ho Povu Pasabe, Suku Malelat, ofisialmente inaugural ona Sentru Maternidade Malelat hodi atende inan feto sira neebe partu.
Serimonia inaugurasaun nee hahu ho lia dadoli, tara tais husi Xefe Suku Malelat, Jose Marques ba PA-RAEOA ho estrutura nomos estrutura PNDS Nasional, kontinua kedan ho tesi fita no bensaun husi amo lulik sira iha Pasabe.
Vizita ohin nee, vizita trabalhu akompanhia serbisu importate husi Ministeriu Administrasaun Estatal (MAE) liu husi Programa Nasional Dezenvolvimentu Suku (PNDS) Nasional atu inaugura fasilidade sala maternidade, iha Suku Malelat.
Ohin ita fahe informasaun ba ita nia komunidade sira, koalia importansia kona ba sala maternidade no utilizasaun, atu salva ita nia inan feto sira neebe ke partu ho dignu, tanba nee governu iha obrigasaun hamutuk ho populasaun iha nee, ita agradese ba PNDS tanba, ajuda ona serbisu Autoridade RAEOA serbisu Rejional Saude primaria nia obrigasaun. Ohin mos iha ita nia intervensaun husu ba serbisu saude, atu buka no kontinua identifika fasilidade saida maka presiza kompleta ba iha sala maternidade ida nee,” dehan PA-RAEOA, Regio da Cruz Salu ba STL iha Sede Suku Malelat, Postu Administrativu Pasabe hafoin realiza serimonia inaugurasaun Salaun Maternidade Malelat, Kuarta (10/12/2025).
Iha tinan oin Orsamentu Jeral Estadu (OJE) 2026, hakarak foku ba buat 3, primeiru maka prestasaun serbisu bazika saude neebe maka besik liu ba povu, hanesan bee moos, sala eskola infantil no hadia kondisaun Estrada sira nee.
“Ohin mos iha nee ita observa atividades neebe halo husi Autoridade Sesante iha tinan 2024, halo Estrada ba suku Malelat, ida nee kapas teb-tebes, ita agradese maibe Estrada nee mai too deit semiteriu martires tinan 1999 ninian, maibe la kontinua too merkadu tanba ohin durante dialogu ho komunidade iha sede suku Malelat, ita haree kareta kamioneta sira foin fila husi merkadu Melalat fila ba Oecusse sae liu husi nee Estrada nee, kareta sae araska teb-tebes tanba kondisaun Estrada maka ladiak, tanba nee kona ba problema estrada iha malelat, tenke kontinua hadia. Iha mos diskusaun liu husi programa PNDS, atu nunee, saida maka entermus de infraestrutura bazika rural neebe ke PNDS nia responsabilidade, programa no prioridade, maibe ita mos hakarak, entermus RAEOA, ita mos hakarak atu iha capital dezenvolvimentu ba iha infraestrutura bazika maka parte rua bele komplemente saida maka adisional ona husi parte PNDS nian neebe RAEOA tuir lei numeru 3 kompetensia PNDS nia programa importante atu haree povu iha area rural ba futuru desentralizasaun,” dehan nia.
Nia akresenta PNDS alende introdus serbisu instituisaun governu sentral iha iha governu lokal maibe ita mos hakarak aproveita PNDS atu nunee bele adisional nesesidade dezenvolvimentu infraestrutura rural neebe ke kualidade, halo povu sente katak sim dezenvolvimentu neebe mai rasik husi povu nia badinas, povu nia kosar ben, bele hatudu kualidade no inegridade serbisu governu ho kualidade no diak liu husi program ida nee.
Iha biban nee Diretora Finansas PNDS Nasional, Reprezentante Sekretariu Ezekutivu PNDS Nasional Aplonia L.L. de Araujo hatoo agradesementu ba Autoridade lokal hamutuk ho povu iha Suku Malelat nomos PNDS Rejional ho estrutura nomos estrutura konselhu do suku ho membru PNDS suku neebe tau matan ba projeitu neebe lao iha suku konsege remata ho susesu.
“Hau lori Sekretariu Ezekutivu PNDS Nasional hatoo obrigadu no parabens ba Xefe Suku Maletat ho estrutura sira hotu hamutuk ho parte saude, konsege tau matan ba obra nee no ohin finaliza ona no entrega ba governu liu husi serbisu saude Oecusse atu utiliza fatin nee atu tulun inan feto sira neebe maka Partu,” dehan nia.
Iha oportunidade hanesan, Xefe Suku Malelat, Jose Marques hatoo agradesementu wain ba MAE liu husi PNDS ajuda harii fasilidade saude ba sala maternidade atu tulun ninia povu hodi uza fatin nee atu partu.
Nunee mos Jestor Postu Administrativu Pasabe, Paulino Marques hatoo benvindu ba Diretora Fibnanas PNDS Nasional reprezenta MAE ho PA-RAEOA ho estrutura ohin hakat mai Pasabe no entrega fasilidade saude ba povu iha Pasabe, Suku Maletat atu utiliza ba sira nia nesesidade.
Tuir observasaun STL, hafoin inaugural Sala Maternidade neebe konstrui husi orsamentu PNDS nian iha Suku Malelat, PA-RAEOA ho Estrutura rona mos povu ninia preokupasaun liu husi dialogu komunitaria iha sede suku Malelat, povu husu atu hadia bee embun, hadia Estrada, bee moos no eletrisidade ba iha bairu Kruz fronteira ho indonezia, uma kain 23 maka seidauk hetan asesu eletrisidade, no husu atu kontinua obra Estrada husi Malelat ba Ban afi.
Jornalista: Joseph Koa
Editor: Joseph Koa
