DILI, STLTIMORLESTE.com – Autoridade Rejiaun Administrativa Espesial Oekusi-Ambeno (RAEOA) liu husi Prezidente Autoridade Interinu atual Sekretariu Rejional Asuntu Administrasaun, Andre Lao ho Diretor Diresaun Rejional Infraestrutura, Remigio Nunu Sila nomos Sekretariu Rejional sira tau fatuk Primeira Pedra ba konstrusaun edifisiu foun Suku Costa.
Tuir Diretor Rejional Infraestrutura RAEOA, Remigio Nuno Sila ba STL liu husi telefone, Tersa (18/03/2025) katak, horiseik Diretor Rejional Infraestrutura hamutuk ho Sekretariu Rejional Administrasaun, Sekretariu Rejional Edukasaun, Sekretariu Rejional Terras e Propriedade, Komendante Interinu Polisia Nasional Timor Leste (PNTL) Rejional Oekusi nomos Diretores Rejionais, Xefe departementu sira, Xefe Suku Costa nomos Komunidade sira iha Suku refere tau fatuk primeira pedra ba kontrusaun ba Edifisiu Sede Suku Foun Suku Costa iha Vila Oekusi.
“Ita harii edifisiu foun ba Sede Suku Costa, nee insiativa husi komunidade liu husi Autoridade Lokal Suku Costa nian rasik atu harii edifisiu suku nee, sira propoin atu bele harii konstrusaun edifisiu Suku neebe diak, oinsa atu halo melhora serbisu iha suku ho diak iha Suku Costa, tanba ita haree no observa ninia geografikamente ho nia populasaun nee boot iha Oekusi, tanba nee Xefe Suku nee rasik,” dehan Remigio.
Nia dehan, medida ba konstrusaun foun edifisiu Sede Suku Costa ho medida 8×9 ho total orsamentu hamutuk US$ 24.000 ital.
Husu ba Nai Xefe Suku Costa ho Konselhu Suku nomos komunidade sira atu tau matan ba konstrusaun edifisiu foun Suku Costa nee rasik atu fo benefisiu ba Suku Costa rasik nomos oinsa kria atividade barak iha suku nee rasik hodi dinamika situasaun iha Sede suku nee rasik iha komunidade sira leet.
Remigio Nuno Sila afirma, Konstrusaun nee rasik hetan ona despaisu husi Prezidente Autoridade RAEOA nomos hetan ona Ordem Servisu ba Kompanhia NISBOC Unipessoal Lda, tanba nia mak sai implementador iha konstrusaun Xede suku refere, husu ba kompanhia hahu ohin ba oin tenke servisu ho kualidade hodi fo ezemplu ba kompanhia sira seluk.
“Aleinde konstrusaun Sede Suku Costa, ita mos iha konstrusaun ba Sede Suku foun ba Kutete nomos Monemeko, maibe ida nee planu husi Sekretariu Rejional Adminstrasaun, Andre Lao, no ida nee sei tama iha planu, sedauk implementa,” dehan nia.
Iha serimonia tau fatuk primeira Pedra, Sekretariu Rejional Administrasaun, Andre Lao hateten, husu ba Diretor Kompanhia NISBC Unipessoal Lda, neebe hetan fiar husi Prezidente Autoridade RAEOA, hodi halao kontrusaun ba edifisiu Foun Sede Suku Costa, husu atu hatudu serbisu ho diak hodi garante kualidade ba estadu ida nee.
“Ohin ita halao ona primeira pedra ba konstrusaun edifisiu Suku Costa husu ba Diretor Kompanhia NISBOC Unipessoal Lda, neebe mak hetan fiar husi Nai Prezidente Autoridade RAEOA, Rogerio Tiago de Fatima Lobato, hodi halao konstrusaun ba edifisiu Sede Suku Costa nee no husu ba kompanhia atu hatudu servisu ho kualidade ba estadu ida nee,” dehan Sekretariu Rejional Asuntu Administrasaun, Andre Lao.
iha oportunidade nee, Xefe Suku Costa, Francisco Colo agradese ba governu Autoridade RAEOA, Lideradu husi Rogerio Tiago de Fatima Lobato neebe maka simu Autoridade Suku Costa nia proposta hodi harii edifisiu foun ba Sede Suku Costa nee rasik.
“Harii Sede Suku Costa, ida nee inisiativa husi Hau rasik hanesan Xefe Suku Costa hodi halo mudansa ba ninia area rasik nomos atu kompleta serbisu administrative Suku nian, tanba governu destaka serbisu apoiu suku, ema nain 4 ho kondisaun Sede Suku tuan la priense ba sira atu halao serbisu adminstrasaun suku ho diak, tanba ida fali husi serbisu diresaun Rejional Agrikultura destaka mos ninia extensionista ba iha Sede Suku, ida nee mos fatin ladun favoravel, ida fali husi Seguransa PNTL destaka Ofisial Polisiamentu Suku (OPS), iha Sede Suku kada suku desde uluk kedan too agora, nee mos fatin ladun favoravel ba sira iha sede suku, tanba nee maka ho preokupasaun sira nee, nuudar Autoridade Suku Costa, hatoo preokupasaun sira nee ba Prezidente Autoridade RAEOA no PA-RAEOA hola insiativa ida nee ho posetivu hodi impleamenta duni, Hau Hanesan Xefe Suku Costa Agradese no fo obrigado wain ba PA-RAEOA ho Sekretariu Rejional Finansa, Diretor Rejional Infraestrutura ho Sekretariu Rejional Adminstrasaun RAEOA nian neebe hakarak implementa servisu ida nee atu fo atendementu administrativu iha Suku, hau hanesan Xefe Suku sente orgulhu no agradese ba autoridade sira nia hanoin diak hodi bele hadia imajen suku Costa neebe lokaliza iha Kapital Oecusse,” dehan nia.
Nia dehan, tau fatuk primeira pedra ba Edifisiu Foun Suku Costa husi prezidente Interino atual Sekretariu Rejional Administrasaun RAEOA, Andre Lao, akompanha mos husi Sekretaria Rejional Edukasaun no Asuntu Sosial (SREAS), Inacia Tamele, Sekretariu Rejional Asuntu Tersa no Propriedade ho Diretor Diresaun Rejional Infra-estrutura RAEOA, Remigio Nuno Sila ho Diretor Rejional sira hotu nomos Xefe Departementu sira iha loron Segunda (17/03/2025).
(jos)
