BATUGADE, STLTIMORLESTE.com – Autoridade Seguransa Timor Leste liu husi Servisu Migrasaun Timor Leste deporta suspeitu mane 1 ho inisial FRCM, ho idade 21 ba nasaun vizinhu Indonezia.
Sidadaun Indonezia neebe Servisu Migrasaun Timor Leste deporta fila nee deskonfia envolve kazu violasaun seksual hasoru menor ho inisial K (17), iha Atambua iha fulan Janeiru nee.
“Ohin autoridade seguransa TL liu husi Servisu Migrasaun Timor Leste entrega hikas ona ba Migrasaun Indonezia nian iha fronteira entre Batugade no Mota-Ain,” haktuir nota komunikadu imprensa neebe STL asesu husi pajina facebook ofisial husi servisu relasaun publiku Ministeriu Interior, Tersa (24/02/2026).
Suspeitu refere halai sai husi Indonezia mai Timor-Leste hodi hakat fronteira terrestre liu dalan illegal, Autoridade Seguransa Indonezia Nusa Tenggara Timur (NTT), halo kedas koordenasaun intensivu ho Komandu Jeral PNTL liuhosi DSIP (Diresaun Servisu Informasaun Polisia).
Tan nee liu tia husi loron 3, suspeitu nee hetan kapturasaun iha rezidensia familia nian iha area Tasi-Tolu neebe partense ba Suku Komoro, Postu Administrativu Dom Aleixo, Munisipiu Dili no entrega kedas ba Servisu Migrasaun hodi halo idenitfikasaun.
Iha prosesu identifikasaun Suspeitu FRCM hela iha kampung Halirem, Desa Lirak, Kecamatan Atambua Selatan, Kabupaten Belu, neebe halai mai Timor iha loron 29 janeiru no hetan kapturasaun husi PNTL iha loron 23 Fevereiru 2026.
Bazeia ba kooperasaun diak entre autoridade Seguransa Indonezia no PNTL, ohin loron tersa 24 fevereiru tinan 2026 Servisu Migrasaun Timor Leste ofisialmente entrega hikas suspeitu nee ba Migrasaun Indonezia nian iha Batugade hodi submete ba prosesu investigasaun.
Enkuantu prosesu haruka fila sidadaun Indonezia nee lidera husi Diretor Jeral Servisu Operasaun no hetan mos akompanamentu husi Adidu Seguransa KBRI nian, Konsul Timor Leste iha Kupang, Adida Migrasaun iha Atambua, Komandante UPF no-mos Komandante Postu Servisu Migrasaun Batugade..
(alb)
