BAUKAU, STLTIMORLESTE.com – Autoridade Suku Kaibada Makasae, iha Postu Administrativu Baukau Vila, husu Autoridade Munisipal atu implementa projetu 5 iha Kaibada Makasae hodi responde nesesidade komunidade iha suku refere.
Preokupasaun neehatoo husi Xefe Suku Kaibada Makasae, Julio Alegria Belo bainhira hasoru iha Kaibada Makasae, Tersa (29/4/2025).
“Ami husu Autoridade Munisipiu Baukau atu halo alargamentu ba Sede Suku, halo melhoramentu ba estrada, kanalizasaun bee moos ba ami nia komunidade, harii postu saude ida, nomos prezisa konstrusaun uma ba Polisia Suku,” afirma Julio Alegria Belo.
Nia hatete, Kaibada Makasae nuudar suku foun iha Postu Administrativu Baukau Vila. Suku nee konsidera nuudar suku urbana, kondisaun infra-estrutura (hanesan mensiona nee) seidauk sufisiente. Hanesan estrada husi Suku Tirilolo-Kaibada Makasae too Suku Buruma, dadaun nee kondisaun aat no kloot, nee presiza konstrui.
Nuudar suku foun, Kaibada Makasae seidauk iha Postu Saude, sei laiha uma ba Ofisial Polisiamentu Suku (OPS), laiha Sede suku propriu ba estrutura suku no komunidade balu seidauk asesu bee mos. Nia husu Autoridade Munisipiu Baukau tau atensaun, liliu konstrui sira nia sede suku, nunee estrutura Konselhu Suku Kaibada Makasae bele halao prestasaun servisu atendementu ho diak ba komunidade.
Prezidente Autoridade Munisipiu Baukau, Veneranda Lemos enkoraja, Autoridade Suku Kaibada Makasae husu atu implementa projetu 5 iha sira nia area. Nee aprezenta ona ba Assembleia Postu Administrativu (ASPA) no hetan ona aprovasaun, hafoin postu lori ba Konselhu Konsultivu Munisipal hodi deskute. Mekanismu servisu lao nunee ona.
“Na’i Xefe Suku husu nee lori ba ASPA, bainhira ASPA aprova ita sei lori ba Konselhu Konsultivu mak halo aprovasaun ba nesesidade, la hanesan ona uluk ida idak halai ba nasional, nee lavale, maibe vale liu mak lori ba instrumentu neebe Governu estabelese liu husi ASPA,” hateten Veneranda Lemos.
Maibe nia haree, problema Suku Kaibada Makasae nian nee laos kestaun. Maibe sei fo solusaun bainhira suku aprezenta ona iha reuniaun ASAP no hetan aprovasaun, lori ba reuniaun Konselhu Konsultivu Munisipal mak sei deside. Implementa liu husi Programa Nasional Dezenvolvimentu Suku no Programa Dezenvolvimentu Integradu Munisipal. Nee deside hamutuk iha Konsultivu Munisipal.
(tom)
