BAUKAU, STLTIMORLESTE.com – Autoridade Suku Karaubalu preokupa kondisaun estrada urbana iha Vikeke Vila, neebe too ohin loron kondisaun sei aat no grave.
Xefe Suku Karaubalu, João Salsinha Pinto hateten, diresaun estrada husi Munisipiu Vikeke too Munisipiu Vikeke Vila, hanesan husi area Larigutu too area Postu Administrativu Ossu kondisaun aat no husi Postu Ossu too area Bekesi kondisaun diak, tanba hetan ona reabilitasaun, enkuantu husi Bekesi too Vikeke Vila kondisaun aat difikulta movimentu ema ho transporte publiku no privadu.
“Estrada iha vila laran ita haree tempu udan tahu’u dodok, tempu bailoron rai rahun sai preokupasaun mak kona-ba estrada nee,” hateten João ba STL liu husi telefone, Segunda (21/07/2025).
Nia sublina, kondisaun estrada husi area Bekesi too Vikeke Vila hamutuk kilometru 5 iha neebe tempu udan rai kois hodi difikulta movimentasaun transporte, tanba estrada kondisaun dodok, enkuantu iha tempu bailoron provoka rai rahun suar hodi afeta ba komunidade sira nia kondisaun saude afeta moras Infesaun Respiratoriu Agudu.
Nia fundamenta, kondisaun estrada refere inisiu kedas iha Timor ukun aan too ohin loron, maibe parte relevante liu-liu Ministeriu Obras Publikas seidauk tau atensaun.
“Nee estraga imajen Vikeke nian, tanba nee estrada urbana laos estrada remotas,” katak João.
Autoridade Suku nee husu Ministeriu Obras Publikas atu tau atensaun ba kondisaun estrada iha Vikeke Vila, tanba kondisaun estrada urbana neebe daudaun hatudu imajen la diak ba Munisipiu Vikeke, tanba kondisaun estrada iha vila laran aat hanesan mos kondisaun estrada remotas sira.
Diretor Servisu Munisipal Obras Publikas Vikeke, Casildo G. Soares rekonhese kondisaun estrada iha Vikeke Vila aat no iha tinan kotuk submete ona proposta ba Ministeriu neebe tuir planu sei hetan reabilitasaun iha tinan nee husi kompanhia lokal balun ho tipu nahe’e alkatraun.
“Estrada nee kompanhia balun hetan ona fiar husi Nasional sei sabung alkatraun nee too vila laran, pedidu nee submete tinan kotuk kedas foin ita rona rezultadu pozitivu iha tempu besik implementa obra nee,” hateten Casildo.
Diretor nee espresa, bainhira projetu refere implementa sei fasilita movimentu transporte no Servisu Obras Publikas Munisipal kontinua submete kondisaun estrada rural no Munisipal iha Vikeke ba nasional nunee Ministeriu bele solusiona, tanba kondisaun estrada husi suku no Postu ba iha Vikeke Vila barak kontinua difikulta movimentu transporte, tanba kondisaun aat.
(tom)
